Хитай һөкүмити ахбарат йиғини өткүзүп “5-‍июл қирғинчилиқи” ни ақлиди

Мухбиримиз әркин
2021.07.06

Чәт әлдики ‍уйғурлар кәң көләмлик наразилиқ намайиши өткүзүп, “5-июл үрүмчи қирғинчилиқи” ниң 12 йиллиқини хатирлигән бир вақитта, хитай һөкүмити ‍өзиниң бу вәқәни қанлиқ бастурғанлиқини ақлиған. Уйғур аптоном районлиқ һөкүмәт 5-июл бейҗңда ахбарат йиғини өткүзүп, “5-июл вәқәси” ниң “дөләт ичи-сиртидики шәрқий түркистан күчлириниң бирлишип уюштурған еғир зораванлиқ җинайи вәқәси” ‍икәнлики, өзлириниң бу вәқәни бастуруп, пуқраларни қоғдиғанлиқини илгири сүргән.

“хитай хәвәрлири” ториниң билдүрүшичә, йиғинда сайитҗан савур, җав әйчин исимлик аталмиш шаһитлар сөз қилип, уйғур намайишчилириниң “қаттиқ җазалиниши керәклики” ни билдүргән. Бирақ улар 7-июл калтәк-тоқмақ көтүрүп, уйғурларға һуҗум қилған хитай ашқунлириниң қилмишини тилға алмиған. 5-Июл күни уйғурлар нурғун дөләтләрдә намайиш қилип, бу қирғинчилиқниң 12 йиллиқини хатирлигән. Намайишчилар бу вәқәдә мәсулийити бар кишиләрни җавабкарлиққа тартишни, вәқәдә ‍өлтүрүлгән, ғайиб болған, түрмигә ташланған уйғурларниң из-дерикини беришни тәләп қилған иди.

Лекин ахбарат йиғинида уйғур аптоном райониниң баянатчиси елиҗан инайәт, “шинҗаңниң сотсиялистик қанун байриқини игиз көтүрүп”, б д т ниң алақидар бәлгилимириниң роһиға асасән “терорлуқ” вә “ашқунлуқ” қа қаттиқ зәрбә бәргәнлики, “пуқраларниң түп һоқуқиниң таҗавузға учримаслиқиға әң зор дәриҗидә капаләтлик қилғанлиқи” ни илгири сүргән. Хитай һөкүмити бу вәқәдә көп қисми хитайлар болуп 197 кишиниң ‍өлгәнликини қәйт қилсиму, бирақ уйғур тәшкилатлири миңлиған уйғурниң өлтүрүлгән, түмигә ташланған вә ғайип болғанлиқини илгири сүрүп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.