Uyghur aptonom rayonluq hökümet blinkénni "Shinjangliq saxta ziyankeshlikke uchrighuchilar" bilen körüshüsh bilen eyibligen

Muxbirimiz erkin
2021-07-16
Share

Uyghur aptonom rayonluq hökümet amérika tashqi ishlar ministiri blinkénning ötken hepte Uyghur lagér shahit we a'ile ezaliri tutqundikiler bilen körüshkenlikini tenqidlep, blinkénni "Shinjangliq saxta ziyankeshlikke uchrighuchilar" bilen körüshüsh bilen eyibligen. Blinkén Uyghurlar bilen körüshkendin kéyin twittérda uchur yollap, Uyghur lagér shahitliri we a'ile ezaliri tutqundiki Uyghurlar bilen körüshkenlikidin iptixarliq hés qilghanliqini bildürgen.

"Xitay xewerliri" torining bildürüshiche, Uyghur aptonom rayonluq hökümetning bayanatchisi élijan inayet 15-iyul béyjingda ötküzülgen axbarat yighinida blinkén körüshken shahitlarning ichide, xitay jama'et xewpsizlik organliri tutush buyruqi chiqarghan jinayetchi qachqunlar bolupla qalmay, "Saqchi qiyapitige kiriwalghan aldamchilar" ning barliqi, "Ularning yalghan guwahname yasap, saxta guwahliq bergenliki" ni ilgiri sürgen.

D u q ning re'isi dolqun eysa blinkén bilen körüshkenlerning ichide bolmisimu, biraq élijan inayet uni blinkén bilen körüshkenlerning ichidiki tutush buyruqi chiqirilghan "Jinayetchi qachqun" dep körsetken.

Xitay hökümiti Uyghurlargha "Irqiy qirghinchiliq" qilghanliqi, ularni lagérlargha qamap, mejburiy emgekke salghanliqini ret qilsimu, biraq u xelq'ara musteqil tekshürgüchilirining Uyghur élide cheklimisiz tekshürüsh élip bérishini ret qilip, lagér shahitlirigha shexsiy hujum qilip kelgen. Amérika tashqi ishlar ministirliqi yéqinda élan qilghan "Eléy wéssél irqiy qirghinchiliq doklati" da xitayning Uyghurlargha qarita dawamliq "Irqiy qirghinchiliq" we "Insanliqqa qarshi jinayet" sadir qiliwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet