Xitay hökümiti chet ellik sayahetchilerning bilogi arqiliq özini teshwiq qilishni kücheytmekte

Xitayning teshwiqat wasitiliri xitaygha sayahetke kelgen chet ellikler, bolupmu tor cholpanliridin paydilinishning ünümlük bolidighanliqini körüp, ulargha keng imkaniyet yaritip bérish bilen birge, dölet ichi sirtidiki taratquliri arqiliq ularning widiyolirini tarqitishqa bashlighan.

“Nyu-york waqti géziti” 1-awghust élan qilghan obzorda déyilishiche, yutub we instagram supisida minglighan, yüz minglighan egeshküchisi bolghan wilogérlar (widiyo blogérliri) xitaygha sayahetke kélip, mangghan-turghan, yégen-ichkenlirini widiyo qilip tarqatqan hemde xitay sheherliridiki “Tereqqiyat we güllinish” lerni dawrang qilghan. Arqidin xitayning dölet taratquliri ularni ziyaret qilip, dölet ichi we sirtidiki taratquliri arqiliq ularni téximu köp teshwiq qilghan.

Xewerde éytilishiche, xitay taratqulirining bu wilogérlarni teshwiq qilishidiki meqsiti, birinchidin xitay iqtisadini janlandurush, ikkinchidin, gherb döletlirining xitaygha qarshi sözlirige gherbliklerning aghzi arqiliq reddiye bérish, üchinchidin, Uyghur élidiki Uyghur qatarliq milletlerge yürgüzüwatqan jinayetlirini dawamliq inkar qilish iken.

Ürümchige ziyaretke barghan en'giliyelik er-xotun özining widiyosida “Eger siz peqet gherb taratquliriningla geplirini anglisingiz, xitaydiki bu jay eng köp talash-tartish qilinidighan jaydur. Uyghurlarning hemmisi yaxshi yashawatqandek qilidu” dégen. Bu tor cholpanliri özlirining xitay hökümiti bilen héchqandaq munasiwiti yoqluqini tekitligen, beziliri özining xitaygha kélishtiki meqsitining peqet sayahet qilish ikenlikini, siyaset, din bilen héchqandaq ishi yoqluqini bildürgen. Emma Uyghur élige ziyaretke barghanlar u jaydiki teqip-nazaret we tekshürüshtin qéchip qutulalmighan. Mesilen, en'giliyelik sayahetchiler bir bazargha kiridighanda bixeterlik tekshürüshidin ötüshke mejbur bolghan. Birsi buni chüshendürüp, “Bazarning bixeterliki üchün ular kirip-chiqqanlarni tekshüridu” dégen. Ularmu özlirining bu qisqighine ziyaritide alghan körünüshlirining tolimu cheklik ikenlikini étirap qilghan.

Uyghur élige barghan muxbirlarningla emes, sayahetchilerningmu her da'im teqip-nazaretke élinidighanliqi, yerlik kishiler bilen paranglashqanda dexli-teruzgha uchraydighanliqi köptin béri melum bolup kéliwatqanidi. Bu maqalide éytilishiche, Uyghur élige sayahet barghan bir ispaniyelik ayal kochidiki saqchi mashinisining teqib qilishigha uchrighanliqini, yataq alghili méhmanxanigha kirgende mulazimning awwal saqchigha téléfon qilghanliqini, andin saqchining méhmanxanigha kélip uni izdigenlikini torda ashkarilighan.