Hoshur qari qatarliq tonulghan artislar siyasiy teshwiqat oyunliri qoyushqa mejburlanmaqta

Xitayning tengritagh torining 22-awghust düshenbe künidiki xewiride ürümchidiki “Opéra ömiki” ning hoshur qari, güzelnur qurban, turghun imir, güljamal metniyaz qatarliq Uyghurlar arisida tonulghan artisliridin teshkillen'gen ömekning xotenning qaraqash nahiyeside 8-ayning 18-künidin 20-künigiche toqquz meydan oyun qoyghanliqi tilgha élin'ghan.

Xewerde artislarning 18-awghust qaraqash nahiyisi jahanbagh yézisining chaharbar kentide qoyghan tunji meydan oyunida, diniy esebiylikni tügitish we milletler ittipaqliqini medhiyileshni bash téma qilghan “Ishimizgha arilashma”, “Dada, méni oqut” dégendek témilardiki nomurlarni orunlighanliqi tilgha élin'ghan.

Radi'omiz yerliktin igiligen ehwallarda bolsa, nahiyilik hökümet we yéziliq hökümetning qizil teshwiqat tüsini alghan bu naxsha, itotlarni körüshke teweliktiki déhqan, charwichilarni mejburiy qatnashturghanliqi melum boldi.

Dunya Uyghur qurultiyi qatarliq Uyghur teshkilatliri da'irilerning Uyghurlargha qaritilghan siyasiy teshwiqatni barghanche kücheytiwatqanliqini tenqidlimekte.Dunya Uyghur qurultiyi bayanatchisi dilshat rishit 23-awghust radi'omizda bayanat bérip: “Da'iriler ilgiri yézilargha chüshken kadirlarni oy-öylerge kirip teshwiq qilduratti. Bu yil uniwérsitét oqughuchiliri yazliq tetilini qurban qilip, siyasiy teshwiqat hashargha zorlandi, bu hepte yene, öz talanti bilen Uyghurlar arisida tonulghan artislarnimu bu xil siyasiy teshwiqatqa zorlimaqta. Bu ehwal Uyghurlarning milliy sen'itidin zoq élish, sen'etchilirini qedirlesh rohini yoq qilmaqta, shunga hazir Uyghurlarda sen'et nomurliridin bizar bolidighan keypiyat kücheydi. Dunya bu yüzlinishke diqqet qilishi we xitay hökümitining bu qilmishini eyiblishi kérek” dédi.