Хитайниң бир әмәлдари уйғур районидики мусулманларни “дунядики әң бәхтлик кишиләр” деди

Мухбиримиз әркин
2017.08.25

Уйғур аптоном райониниң бир әмәлдари җүмә күни мақалә елан қилип, уйғур районидики мусулманларни “дунядики әң бәхтлик кишиләр” дәп көрсәткән һәм хәлқни “диний радикаллар” вә уларниң ғәрблик қоллиғучилириниң тарқатқан хәвиригә ишәнмәсликкә чақирған.

Бу сөзләрни уйғур аптоном районлуқ партком ташқи тәшвиқат идарисиниң муавин башлиқи ғәйрәт сәләй җүмә күни “шинҗаң гезити” дә елан қилған мақалисидә қилған.
Ғәйрәт сәләйниң сөзи хәлқара ахбарат васитилириниң диққитини қозғиған.

Ройтерс агентлиқи җүмә күни бәргән бу һәқтики хәвиридә, уйғур районида йеқинқи бир қанчә йилдин бери бейҗиң даирилири ислами радикаллар, дәп әйибләп кәлгән мусулман уйғурлар билән етник хитайлар оттурисида чиққан тоқунушларда нәччә йүзлигән адәм өлгәнлики, кишилик һоқуқ вә муһаҗирәттики уйғур тәшкилатлириниң тоқунушни хитайниң мәдәнийәт, диний контроллуқи пәйда қилған әндишә кәлтүрүп чиқарди, дәп қарайдиғанлиқини билдүргән.

Уларниң илгири сүрүшичә, хитай һөкүмити йеқинқи йиллардин бери уйғурларниң намаз оқуши, роза тутуши, диний тәрбийә елиши, һәҗ қилиши, закат бериши, диний паалийәтләрни уюштуруши қатарлиқларни мәни қилип, уларниң мәдәнийитини, ана тилини чәклигән.

Қаршилиқ қилғанларни шиддәтлик бастуруп, өлүм җазаси яки узун муддәтлик қамақ җазалириға һөкүм қилип кәлгән. Бирақ ғәйрәт сәләй мақалисидә, уйғур райониниң “муқим, инақ, гүлләнгән, ечиветилгән, заманиви шинҗаң” икәнликини әскәртип, “нурғун кишиләр йүрикидә дунядики әң бәхтлик мусулманлар шинҗаңда, дәп қарайду” дегән.

Униң қаришичә, уйғур районидики мәсилини “диний радикаллар” билән “ғәрбтики дүшмән күчләр” бирлишип “ғәрәзлик” пәйда қилғаникән. Кишилик һоқуқ тәшкилатлири хитай даирилирини өзиниң уйғур районидики сияситини өзгәртишкә чақирип кәлгән болсиму, бирақ у, бу райондики наразилиқ вә муқимсизлиқни өзиниң қаттиқ қол сиясити пәйда қиливатқанлиқини изчил рәт қилип кәлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.