Chet ellerdiki xitay muhajirlar jem'iyetliri xitayning Uyghur irqiy qirghinchiliqini inkar qilish teshwiqatigha aktip maslashqan

Muxbirimiz irade
2021-09-30
Share

Xitay hökümitining Uyghurlargha qaritiwatqan irqiy qirghinchiliqini inkar qilish teshwiqat jéngida chet ellerdiki xitay muhajirlar jem'iyetlirining aktipliq bilen maslishiwatqanliqi melum bolmaqta.

Xitay hökümiti Uyghurlargha irqiy qirghinchiliq yürgüzüwatqanliqi heqqidiki tenqidlerge qarshi keng kölemlik teshwiqat herikitini qanat yaydurmaqta. Xitay hökümiti uyushturghan bu xildiki teshwiqat yighinlarning biri27-séntebir küni ürümchide ékran arqiliq échilghan.

Xitayning "Tengritagh tori" ning xewiridin qarighanda, yighinda amérika, en'giliye, gérmaniye, fransiye, awistiraliye, rosiye, kanada, yaponiye, se'udi erebistan, misir, türkiye, yéngi zélandiye, gollandiye, shiwitsiye, hindinoziye, pakistan, qazaqistan, qirghizistan, özbékistan qatarliq 20 dölettiki xitay muhajirlar jem'iyetlirining wekilliri we shu döletlerde turushluq elchixana xadimliri tor arqiliq bu yighin'gha qatnashqan.

Ékran yighinida Uyghur aptonom rayonining mu'awin re'isi erkin tuniyaz gep yorghilitip: "Shinjang hazir tarixtiki eng yaxshi tereqqiyat basquchida turmaqta. Amérika we gherbtiki xitaygha qarshi küchler shinjang xelqining yaxshi turmush kechürüwatqanliqini körmeslikke saldi. 'jaza lagéri', 'irqiy qirghinchiliq' qatarliq nechche yüz yilliq yalghanchiliqni tarqatti. . . Ularning tüp meqsiti shinjanggha munasiwetlik mesililerni yoghinitip, shinjangni muqimsizlashturush we junggoning tereqqiyatigha tosqunluq qilishtur," dégen.

Xewerde éytilishiche, yighinda yene kanada, en'giliye we gérmaniye qatarliq döletlerde turushluq xitay muhajirlar jem'iyetlirining bashliqliridin wang wénkang, yé zingya we xu'a ping qatarliqlarmu söz qilghan. Ular bir éghizdin "Gherbtiki siyasetchiler rasـt gep qilmaydu, biz özimiz turushlu'oq döletlerdiki ammigha shinjangdiki emeliyetni teshwiq qilimiz. Bizning shundaq qilish mes'uliyitimiz we mejburiyitimiz bar," dégen.

Xitay da'irilirining Uyghurlargha qaritiwatqan irqiy qirghinchiliqi xelq'arada küchlük tenqidke uchrighandin kéyin, xitay mushu xildiki axbarat élan qilish yighini we sin yighinliri arqiliq xelq'ara jama'etning pikir éqimigha qarshi teshwiqat herikitini qanat yaydurghan idi. Chet ellerdiki Uyghur közetküchilerning qarishiche, yuqiriqi xitay muhajirlar jem'iyetliri wekillirining sözi, xitay hökümitining bu teshwiqat herikitide xitay muhajir teshkilatliridin paydilinishni yenimu kücheytiwatqanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet