Хитай һөкүмитиниң қазақистандики “шинҗаң яхши җай” тәшвиқати диққәт қозғимақта

Вашингтондин мухбиримиз әзиз тәйярлиди
2023.11.09

Хитай һөкүмити башқурушидики “тәңритағ” ториниң 9-ноябирдики хәвиридә ейтилишичә, алдинқи күни қазақистан пайтәхти астанә шәһиридә “шинҗаң аҗайип яхши макан” темисидики әдәбият-сәнәт кечилики өткүзүлгән. Бу паалийәт қазақистанниң башқа шәһәрлиридә вә өзбекистанда давамлиқ көрситилидикән.

Бу һәқтики син хәвиридә ейтилишичә, уйғур дияридин кәлгән он нәччә милләтниң сәнәт гуруппилири өз миллитигә вакалитән номур көрсәткән һәмдә бу арқилиқ бу он нәччә милләтниң уйғур дияридики көп санлиқни тәшкил қилғучи “бәхитияр хәлқ” ниң вәкиллири икәнлики ишарә қилинған. Шуниңдәк бу җәрянда зиярәтни қобул қилған кишиләр “бу арқилиқ шинҗаңда шадиман һаятлиқниң давам қиливатқанлиқини көрдуқ” дегән.

Һалбуки, ғәрб дөләтлири вә бирләшкән дөләтләр тәшкилати (б д т) ға охшаш дуняви тәшкилатлар бирдәк “ирқий қирғинчилиқ” яки “инсанийәткә қарши җинайәт” дәп әйибләватқан қилмишлар садир болуватқан уйғур диярида милйонларчә кишиниң лагерларға қамалғанлиқи, шу тутқунлар ичидә миңлиған қазақ хәлқиниңму барлиқи йеқинқи йилларда дуня җамаитигә, җүмлидин қазақистан хәлқигә көпләп мәлум болған қәбиһликләр қатаридин орун алғаниди. Шундақ әһвалда хитай һөкүмитиниң һеч иш болмиғандәк қазақистан вә өзбекистанда “шинҗаң дегән бәкму яхши җай” темисида сәнәт номури көрситиши буниң бир түрлүк сиясий ғәрәздики паалийәт икәнликидин бешарәт, дәп қариливатқанлиқи мәлум.

Уйғур дияридики қирғинчилиқ түпәйлидин хитай һөкүмити өткән йиллардин буян хәлқара җәмийәтниң һәмдә ғәрб дөләтлириниң кәскин тәнқидигә, шуниңдәк түрлүк иқтисадий җазалириға дуч кәлгәниди. Буниңға қарши чариләр қатарида хитай һөкүмити ши җинпиңниң биваситә йолйоруқи бойичә “шинҗаң һәққидики һекайиләрни яхши сөзләш” долқунини қозғиған һәмдә буниңға ғайәт зор малийә күчи аҗратқаниди. Бу қетимқи сәнәт кечиликиму нөвәттә ашу хилдики сахта учур тарқитиш урунушларниң бири, дәп қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.