Хитай һөкүмити японийәдә уйғур дияри һәққидә лексийә уюштурди

Мухбиримиз әзиз
2021-11-23
Share

Хитай һөкүмити йеқинқи мәзгилләрдә чәтәлләрдә бир қатар тәшвиқат паалийәтлири тәшкилләп уйғур дияридики вәзийәтниң "бәхтиярлиқ" вә "шадиманлиқ" қа толғанлиқини тәкитләп кәлгәниди. Йеқинда әнә шу хилдики паалийәтләрниң бири японийәниң осака шәһридә өткүзүлди.

Хитай һөкүмити башқуришидики "тәңритағ" ториниң 23-ноябирдики хәвиридә ейтилишичә, хитай һөкүмитиниң осака шәһридики консулханиси "хитайни чүшиниш" темисидики йәттинчи мәйдан лексийәни башлиған һәмдә буниңға "японийә җамаитигә һәқиқи шинҗаңни тонуштуруш" дәп мавзу қойған. Уйғур аптоном районлуқ һөкүмәтниң баянатчиси шү гуйшяң вә елиҗан анайәт мәхсус сөз қилип "шинҗаңдики муқимлиқ вә тәрәққият" темисида лексийә бәргән.

Хәвәрдә ейтилишичә, шү гуйшяң мухбирларниң бу һәқтики соаллириға җаваб берип "сиз дәватқан ‹тәрбийәләш мәркизи' әмәлийәттә бир мәктәп. У җайда қанун тәрбийәси вә башқа билимләр өгитилиду" дегән. Елиҗан анайәт болса лагер шаһидлириниң баянлирини "пүтүнләй билҗирлиғанлиқ" дәп көрсәткән.

Һалбуки, түрлүк учур мәнбәлири лагерларға қамалғанлар арисида онмиңлиған уйғурниң алий мәлуматлиқ кишилири барлиқини, уларниң һечқандақ "тәрбийәләш" кә еһтияҗи йоқлуқини намайән қилғаниди. Шу қатарда америкадики уйғур паалийәтчиләрдин рошән аббас өзиниң лагерға қамалған һәдиси гүлшән аббасниң пенсийәгә чиққан тәҗрибилик дохтур икәнликини, лагерларға қамалған кишиләр арисида бундақ юқири мәлуматлиқ кишиләрниң бәкму көплүкини көп қетим тәкитлигәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт