Xitayning osakadiki bash konsulxanisi “Heqiqiy shinjangni körsitish” namliq teshwiqat yighini achqan

Muxbirimiz irade
2021-12-16
Share

“Xitay xewerler tori” ning xewirige qarighanda, xitayning osakadiki bash konsulxanisi 15-dékabir küni Uyghur éligha munasiwetlik bir tor teshwiqat yighini uyushturghan. Bu yighinda “Lyangzey sizge heqiqiy shinjangni körsitidu” namliq karton yürüshlük filimi we bashqa filimlerni körsitish arqiliq, xitayning atalmish “Shinjangdiki heqiqetler gherb taratqulirida déyilgenlerdin perqliq” dégen saxta teshwiqati bazargha sélin'ghan.

Xitay hökümitining Uyghurlargha irqiy qirghinchiliq we mejburiy emgek yürgüzüwatqanliqi, yaponiye axbaratlirida keng orun alghan we yaponiyening yéngi hökümet ezalirimu köp qétim Uyghurlar mesilisde so'allargha duch kelgen idi. Uning üstige yaponiyening béyjing qishliq olimpikige qatnishish yaki qatnashmasliq mesiliside qandaq pozitsiye bildüridighanliqi qiziqish qozghawatqan bir peytte, osakadiki xitay konsulxanisining bu teshwiqat pa'aliyitini uyushturushi diqqet qozghidi.

Sin yighinida Uyghur élining güzel menziriliri, naxsha-usulliri namayen qilinip, Uyghurlarning ussul oynap, naxsha éytip, xoshal-xoram yashawatqanliqidek filimler körsitilgen. Osakadiki xitay bash konsuli shö jyen söz qilip: “Bu bir türküm karton filimlar yaponluq dostlarning shinjangni obyéktip tonushi, heqiqiy qiyapitini chüshinishi we shinjang xelqining heqiqiy awazini anglashtiki kichik bir qedem bolup qalidu,” dégen.

Xitay hökümiti ilgirimu köpligen döletlerde mushu xildiki pa'aliyetlerni uyushturup, özlirining Uyghurlargha qarita “Irqiy qirghinchiliq” qilghanliqi yaki “Insaniyetke qarshi jinayet” ötـküzgenlikini inkar qilghan idi. Emma xitayning shunche zor meblegh we adem küchi serp qilip, axbarat we pikir erkinliki mewjut démokratik döletlerde bu xil saxta teshwiqatlarni élip bérishi, héchqanche ünüm körsitelmigen idi.

Bu nöwet osakadiki xitay konsulxanisi uyushturghan bu teshwiqat pa'aliyitige Uyghur élida tughulup öskenliki we chet ellerde muhajir bolup yashawatqanliqi ilgiri sürülgen jemile isimlik bir Uyghurmu qatnashturulghan we sözlitilgen. Chet ellerdiki Uyghurlar, xitay hökümitining bundaq teshwiqat heriketlirining ularning jinayitini ispatlaydighan polattek pakitlar aldida özini aldashtin bashqa ishqa yarimaydighanliqini teketleshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet