Tik-tokning 300 xizmetchisi xitay hökümet taratquliri üchün ishligen

Tik-tok we uning bashqurghuchisi bolghan Byte Dance (oynaq xet) shirkitide ishleydighan 300 xizmetchi xitayning hökümet taratqulirigha ishligen bolup, beziliri hazirmu xitay üchün ishleydiken.

Forbes Torining xewirige asaslan'ghanda, LinkedIn  Torigha tizimlatqan xizmetchilerning uchurlirini estayidil tekshürüsh arqiliq az dégende 300 ademning buningdin ilgiri xitayning hökümet taratqulirigha ishligenliki melum bolghan. Buning ichide 23 ademning arxipigha qarighanda, ular bügünki künde Byte Dance  Shirkitining diréktorliri bolup, shirketning nazaretchilik, ammiwi ishlar, karxanilarning ijtima'iy mes'uliyiti we taratqular bilen hemkarlishish qatarliq bölümlirige mes'ul bolup ishlimekte iken. 15  Ademning arxipigha qarighanda, ular shinxu'a agéntliqi, xitay xelq'ara radiyo istansisi, xitay merkiziy téléwiziye istansisi we  xitay yer shari téliwiziyesi qatarliq xitay hökümet taratquliri teripidin yallan'ghan.

LinkedIn Toridiki 50 ademning arxipigha qarighanda, ular tik-tok üchün ishligen yaki hazirmu ishlewatqanlar bolup, uning ichide bir adem mezmun istratégiyesi diréktori iken hemde ilgiri shinxu'a agéntliqining gholluq muxbiri bolghaniken؛ qalghanliri tik-tokning siyaset, istratégiye, tijaret, pul-mu'amile, abontlar tesirati, chet el bazirining éhtiyajigha maslishish qatarliq saheliride xizmet qilghan iken.  

Yuqiriqilardin qarighanda, tik-tok bilen xitay taratqulirining munasiwiti nahayiti zich bolup, xitay hökümiti buningdin paydilinip, özlirining saxta uchurlirini tarqatqan؛ xitay hökümet taratquliri yene Facebook Instagram, Twitter  Sehipiliride xéli zor miqdarda abontlarni toplighan. Tik-tokning bashqa ijtima'iy taratqulardin perqlinidighan yéri, uningda xitay hökümet taratquliri kontrol qilidighan birer hésabat yoq iken؛ yeni xitay hökümet taratquliri öz nami bilen hésabat achmighan.

Xewerde éytilishiche, tik-tok we uning ana shirkiti bolghan ByteDance  Ning shangxeyde bash shitabi bar iken, ular tik-toktin bashqa yene xitayda keng qollinilidighan “Doyin”, “Bügünki bash xewer” qatarliq ijtima'iy taratqular we  tor béketlirini bashquridiken. Tik-tok shirkiti 300 xizmetchining xitay üchün ishligenliki yaki ishlewatqanliqi heqqide bir nerse démigen, inkarmu qilmighan؛ xitay hökümet taratqulirimu bu heqta inkas qayturmighan.