Хитай корла билән чиңхәйниң голмуд шәһири арисидики төмүр йол қурулушини башлиди

Мухбиримиз үмидвар
2017-06-04
Елхәт
Пикир
Share
Принт

Хитай өзиниң «бир бәлвағ бир йол» истратегийәсини өз ичигә вә әтраптики дөләтләргә күчәп тәшвиқ қиливатқан шуниңдәк һәм уни әмәлийләштүрүшкә һәрикәт қиливатқанда хитай төмүр йол қурулуш даирилири уйғур дияри билән хитай өлкилирини туташтуридиған үчинчи төмүр йол линийиси қурулушини башлиди.

Ашкарилинишичә, уйғур дияриниң оттура қисмиға җайлашқан корла шәһиридин биваситә чиңхәй өлкисиниң голмуд шәһирини туташтуридиған төмүр йол қурулушида релис ятқузуш башланған.

Мәзкур линийәниң омуми мусаписи 1213 километир болуп, асаслиқи корла шәһиридин башлинип, тарим ойманлиқи йөнилиши бойичә, лопнур, тикәнлик, чақилиқ, вә миран қатарлиқ җайларни бесип өтүп, әң ахирида чиңхәй өлкисидики голмуд шәһиригә тутишидикән. Мәзкур төмүр йолни хитай қатнаш даирилири үрүмчи билән ләнҗу арисидики асасий линийәдин кейинки уйғур дияри билән ичкири өлкиләрни туташтуридиған муһим җәнубий йол дәп атиған.

Мәзкур төмүр йол линийиси арқилиқ уйғур дияриниң җәнуби қисми, уйғурлар зич олтурақлашқан тарим вадиси әтрапи хитайниң оттура түзләңлик вә деңиз яқилири билән биваситә тутишидиған болуп, бир уйғур сиясий анализчиниң ейтишичә, мәзкур йеңи төмүр йол линийиси бир тәрәптин хитайниң қәшқәр -пакистан иқтисади каридори арқилиқ һинди окян бойлири билән сода-иқтисадий алақисини күчәйтиш ролини ойниса, йәнә бир тәрәптин хитайниң тарим ойманлиқи әтрапида уйғурлар нопус җәһәттә мутләқ көп санлиқни егилиш вәзийитини өзгәртишидә, йәни, техиму көп хитай көчмән аһалисиниң тарим вадисиниң җәнуби районлириға орунлишишини ишқа ашурушида муһим рол ойнайдикән.

Тәңритағ торидики бу һәқтики хәвәрдин ашкарилинишичә, бу қурулуш үчүн 36.5 Милярд йүән мәбләғ аҗритилған болуп, мәзкур йолни тез пүттүрүш вә 2020-йили қатнаш башлаш пилан қилинған.

Пикирләр (0)
Share
Толуқ бәт