Хитай кадир «туғқанлар» ниң йәнә бир вәзиписи уйғур «туғқанлири» ни синға елиш икән

Мухбиримиз ирадә
2017-12-28
Елхәт
Пикир
Share
Принт

Уйғур районлуқ парткомниң орунлаштуруши бойичә мушу айниң 11-күнидин етибарән «милләтләр иттипақлиқи бойичә туққанлишиш һәптилики» дәйдиған бир паалийәт башлитилған иди. Уйғур елидики һәр дәриҗилик кадирларниң йәрликтики уйғурларниң өйлиригә берип, улар билән 24 саәт биргә болуши баш тема қилинған «туққанлишиш һәптилики» паалийити чәтәлләрдики уйғур кишилик һоқуқ паалийәтчилириниң күчлүк тәнқидигә учриған. Бир қисим көзәткүчиләр буни «уйғурларни назарәт қилишниң йәнә бир хил усули», дәп көрсәткән иди.

Дәрвәқә, бүгүн радиомиз гуаңдоң бөлүминиң чөчәктики бир хитай кадирдин игилишичә, бу кадирлар уйғурларниң өйидә йетип-қопупла қалмай, бәлки уларниң күндилик паалийәтлириниму сүрәткә елиши вә уни рәһбәрлик органлириға тапшуруп бериши керәк икән. 

26-Декабир күни, америка авази радиосиму бу һәқтә бир парчә мақалә елан қилип, хитай кадирларниң өзлири чүшкән өйләрдә өй игилириниң намаз оқуш, җайнамаз вә «қуран» сақлаш қатарлиқ ишлирини сүрүштә қилидиғанлиқини билдүргән һәм шундақла бу ғәйрий һадисини «һәммила җайни қаплиған гирәләшмә назарәт механизминиң шәхсләрниң өйлиригичә бөсүп кириши» дәп тәсвирлигән иди. 

Хәлқарадики тәнқидий пикирләрниң көпийиши билән хитайдики һөкүмәт авази болған «хәлқ гезити», «хитай аяллар бирләшмиси хәвәрләр тори» қатарлиқ мәтбуатларму буниңға инкас шәклидә «туққанлишиш һәптилики» ни мәдһийиләйдиған мақалиләрни көпләп елан қилип, бу һәрикәтниң көңүлләрни иллитқанлиқини илгири сүрди. Әмма юқиридики чөчәклик хитай кадир радийомизға қилған сөзидә, хитай кадирларниң давамлиқ уйғурларниң өйигә берип, биллә тамақ йәп, олтуруп келидиғанлиқини, әмма уйғурларниң хитай «туғқанлири» ниң өйлиригә тамақ йегили кәлмәйдиғанлиқини ейтқан.

Пикирләр (0)
Share
Толуқ бәт