Xitay diplomatiye ministéri wang yining türkiye ziyariti közetküchilerning diqqitini qozghimaqta

Igilinishiche, xitay diplomatiye ministéri wang yi 13-noyabir küni enqerede xitay-türkiye diplomatiye ministérliri sözlishish yighinigha qatnashqan.

Mezkur uchrishishtin kéyin xitay diplomatiye minstéri wang yi türkiye diplomatiye ministéri chawush oghli bilen birlikte muxbirlar bilen körüshken.

Xitaydiki xelq torining bu heqtiki xewirige qarighanda, wang yi bilen chawush oghli muxbirlarning türkiye-xitay munasiwetliri, ikki döletningning soda-tijaret alaqisi shundaqla térrorluqqa ortaq taqabil turush heqqide sorighan so'allirigha jawab bergen.

Halbuki, mezkur uchrishishta aldinqi aylardin buyan xitayning bésimi bilen türkiye saqchi orunliri teripidin tutup turuliwatqan istanbuldiki Uyghur siyasiy pa'aliyetchi abduqadir yapchanning délosi tilgha élinmighan.

Abdulqadir yapchan bu yil xitayda échilghan 20 dölet guruhi bashliqlirining uchrishish yighini harpisida türkiye saqchiliri teripidin 1-séntebirde tutup kétilip 29-séntebir küni gunahsiz dep qoyup bérilgen idi. Halbuki, uning nezerbenttin qoyup bérilip, aridin bir sotka ötmeyla yene tutulup kétishi muhajirettiki Uyghur jama'iti arisida küchlük inkas peyda qilmaqta.

Gerche istanbuldiki bakirköy sülhi jaza sot mehkimisi abduqadir yapchanni 40 künlük nazaret astigha alidighanliqini bildürgen bolsimu, emma uning bu muddet ötüp taki hazirghiche tutup turulushi muhajirettiki Uyghur jama'itini endishige salmaqta.

Uyghur közetküchiler, xitay diplomatiye ministéri wang yining türkiye ziyaritining nezerbenttiki Uyghur diniy ölima we jama'et erbabi abduqadir yapchanning teqdirige zadi qandaq signal élip kélidighanliqigha diqqet qilmaqta.