Shi jinping bir hepte ichide qilghan 4 qétimliq sözide xitayni urushqa teyyarliq körüshke chaqirghan

Muxbirimiz irade
2023.03.30

Xitay kompartiyesining bash sékrétari shi jinping bir hepte ichide 4 qétim xitayni urushqa teyyarliq qilishqa chaqirghan. Amérikaliq siyasetchiler shi jinpingning bu sözlirige sel qarashqa bolmaydighanliqini bildürüshmekte.

Amérikada chiqidighan “Tashqi ishlar” zhurnilida élan qilin'ghan maqalida körsitilishiche, shi jinping bu yil 3-ayning béshida xitay xelq qurultiyi we siyasiy kéngeshning yighinlirida sözligen 4 ayrim nutqida xitayni urushqa teyyarlinishqa chaqirghan hemde yene bir sözide générallirigha “Jeng qilishqa jür'et qilish” ni tekitligeniken.

“Tashqi ishlar” zhurnilidiki maqalini “Washin'gton pochtisi géziti” ning béyjingdiki ishxanisining sabiq bashliqi hemde yene xitay heqqidiki bir qanche kitabning aptori jon pomfért (JOHN POMFRET) we shundaqla amérikaning sabiq mu'awin dölet xewpsizlik meslihetchisi matéw pottinggér (MATT POTTINGER) lar yazghan bolup, ular shi jinpingning bir hepte ichide qilghan 4 sözide urush qilishni tilgha élishigha sel qarashqa bolmaydighanliqini tekitleshken. Ular maqalisda buning seweblirini chüshendürüp amérika we dunyani shi jinpingning urush tehditige estayidil mu'amile qilishqa chaqirghan. Ular shi jinpingning hedep urushqa teyyarliq qilish we döletni birlikke keltürüsh arqiliq milliy güllinishni ishqa ashurush heqqide söz qilishining uning teywenni qorqutup qiliwatqan siyasiy urush herikitining yéngi basquchi ikenlikini bayan qilghan we: “Shi jinpingning qoral küchi ishlitip turup teywen arilini élishni xalaydighanliqi éniq. Emma éniq bolmighini, uning bu ishta amérika bilenmu kontrolsiz halda tirkishish xewpini ötkürleshtürüwalidighanliqidek éhtimalliqni hésablighan yaki hésablimighanliqidur” dep yazghan.

Amérika kéngesh palata ezasi marko rubiyomu bügün tiwittéridiki uchurida shi jinpingning bir hepte ichide 4 qétim urush heqqide söz qilghanliqini eskertip, amérikaliqlarni hoshyar bolushqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.