Xitay Uyghur diyarining tebi'iy gaz turuba yolini torlashturush qedimini tézletmekte

Washin'gtondin muxbirimiz erkin teyyarlidi
2024.04.01

Xitay hökümiti Uyghur diyarini xitayning “8 Chong ishlepchiqirish topi” gha aylandurushni téz sür'ette emeliyleshtürüshke küchesh bilen bir waqitta, Uyghur diyarining tebi'iy gaz turuba yolini torlashturush we “Gherbning gazini sherqqe yötkesh” qurulushini kéngeytish qediminimu tézletmekte.

Xitay taratqulirining ashkarilishiche, 29-mart küni kuchada tarim oymanliqining etrapidiki nahiye, sheherlerning tebi'iy gaz turuba yolini torlashturushni meqset qilghan bir tebi'iy gaz turuba yoli qurulush türi bashlan'ghan. Oxshash bir waqitta, 2022-yili 9-ayda bashlan'ghan “Gherbning gazni sherqqe yötkesh” gaz turuba yoli 4-liniyesining Uyghur diyaridiki bölikining kepsherlesh xizmitimu tamamlan'ghan. Xitayda chiqidighan “Xelq géziti” ning 1-aprél küni bergen xewiride, tebi'iy gaz turuba yoli 4-liniyesining Uyghur diyaridiki bölikining bu yil 10 ayda resmiy pütüp ishqa kirishishke teyyar bolidighanliqi qeyt qilinmaqta.

 “Gherbning gazini sherqqe yötkesh” turuba yoli qurulushining 4-liniyesi Uyghur diyarining qirghizistan chégrasidiki erkeshtamdin bashlinip, turpan arqiliq ningshyaning jongwéy shehirige baridiken. Turpandin jongwéyghiche bolghan 1745 kilométirliq bu turuba yolining yiligha 15 milyard kub métir tebi'iy gaz yollash iqtidarigha ige ikenliki, bu liniye xitayning ottura asiya tebi'iy gazini xitaygha toshushtiki muhim qanallirining biri ikenliki qeyt qilinmaqta.

Xitayning Uyghur diyarini “8 Chong ishlepchiqirish topi” gha aylandurush pilani, shundaqla Uyghur diyarining tebi'iy gaz turuba yolini torlashturush we “Gherbning gazini sherqqe yötkesh” qurulushini kéngeytish qedimini tézlitishi, uning amérika bilen bolghan ziddiyiti ötkürliship, teywen boghuzi we jenubiy déngiz weziyiti jiddiyleshken, amérika bilen yaponiye ortaq herbiy qomandanliq sistémisini kücheytishke kirishken bir waqitta élip bérilmaqta. Xitayning 2108 kilométirliq tarim halqisiman tebi'iy gaz turuba yolini torlashturushimu, uning Uyghur diyarini “8 Chong ishlepchiqirish topi” gha aylandurush pilani boyiche rayon'gha kélip yerlishidighan xitay karxaniliri we ahalilirining éhtiyajini chiqish qilghanliqi qeyt qilinmaqta.

Shinxu'a agéntliqining bildürüshiche, bu qurulush türi 2025-yili pütüp ishqa kirishse, teklimakan etrapidiki 9 nahiye, sheherning tebi'iy gaz turuba yoli tori tutashturulup, kündilik gaz bilen teminlesh iqtidari hazirqi 27 milyon kub métirdin, 58 milyon kub métirgha chiqidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.