Xitay Uyghur diyarigha sodiger chaqirish qedimini tézletti

Xitay da'iriliri yéqinda Uyghur diyarida dölet karxanilirining 700 milyard yüenlik meblegh sélish türini élan qilishidin kéyin, Uyghur rayonigha sodiger chaqirish qedimini téximu tézletken.

Xitay hökümet taratqulirining xewerliridin melum bolushiche, Uyghur aptonom rayoni béyjingda bezi chet el döletlirige qarita “Shinjang siyasiti” ni qollash diplomatik teshwiqatini kücheytken bir waqitta, xitayning pul-mu'amile, soda merkizi bolghan shangxeydimu Uyghur diyarigha sodiger chaqirish yermenkisi ötküzüp, karxanilarni bu rayon'gha meblegh sélishqa chaqirghan. Bu yermenke gherb elliri mejburiy emgek endishisi sewebidin Uyghur diyarida ishlepchiqirilghan mehsulatlarni bayqut qilish yaki chekleshni kücheytiwatqan bolsimu, emma xitay hökümiti bu rayon'gha meblegh sélish salmiqini ashurup, rayonda xitayning “8 Chong sana'et topi” berpa qilishqa heriket qiliwatqan bir waqitta ötküzülgen.

“Shinjang géziti”, “Tengritagh tori” qatarliq xitay hökümet taratqulirining qeyt qilishiche, Uyghur aptonom rayonluq hökümet we aptonom rayonluq soda nazaritining 12-aprél shangxeyde ötküzgen sodiger chaqirish yermenkiside, 8 milyard 429 milyon qimmitidiki 20 xil tür boyiche kélishim imzalan'ghan bolup, meblegh sélish türliri énérgiye, toqumichiliq we yéngi matériyal ishlepchiqirishi qatarliq alahide sahelerge chétilidiken. Halbuki, rayonning toqumichiliq we yéngi matériyallar ishlepchiqirish sahesi, amérika qanun chiqirip bu xil mehsulatlarning amérika bazirigha kirishini chekligen nuqtiliq saheler hésablinidu. Melum bolushiche, bu Uyghur aptonom rayonluq hökümetning tunji qétim bundaq zor kölemlik yermenke ötküzüp, sodiger chaqirishi iken.

Xewerlerde sodiger chaqirish ömeklirining nuqtiliq “8 Chong sana'et topi” , “Erkin soda rayoni” qurulushi we énérgiye sahelirige sodiger chaqirghanliqi, shuning bilen bir waqitta bu yil 6-ayda ürümchide ötküzülidighan 8-qétimliq “Xitay we yawro-asiya yermenkisi” ge sodiger chaqirghanliqi bildürülmekte. Chet el tetqiqatchilirining bildürüshiche, xitayning Uyghur diyarigha meblegh sélish salmiqini ashurushigha egiship, Uyghur mejburiy emgikining kölimimu kéngeymekte iken.