Xitayning ottura we sherqiy jenubiy asiyadiki Uyghurlarni iz qoghlap teqib qiliwatqanliqi ashkarilandi

Washin'gtondin muxbirimiz uyghar teyyarlidi
2024.02.22

“Nyu-york waqit géziti” ning 22-féwraldiki xewirige asaslan'ghanda, xitay hökümiti yalliwalghan xususiy xakkér shirketlirining ichkiy ehwallirigha munasiwetlik uchurlar ashkarilan'ghan.

Ashkara bolghan bir toxtam layiheside körsitilishiche, Enshün I-Soon (安洵) Shirkitining Uyghur élidiki saqchi organlirigha ottura asiya we sherqiy jenubiy asiyadiki Uyghurlarni iz qoghlap teqib qilish üchün, atalmish “Térrorluqqa qarshi turush” namidiki yuqiri téxnikiliq iz qoghlash üskünilirini yasap bergen iken. Shuning bilen bir waqitta yene bu téxnika arqiliq mongghuliye, malaysiya qatarliq döletlerning awiyatsiye shirkiti, köchme xewerlishish we hökümet organlirigha a'it sanliq melumatlargha érisheleydiken.

Shexsiy bixeterlik höddigerlik shirkiti Enshün I-Soon (安洵) Da ishligen ikki xizmetchi, birleshme agéntliqigha ötken heptining axirida torda ochuq-ashkara élan qilin'ghan höjjetlerning toghriliqini delilligen.

Mutexessisler toxtam, léksiye we xéridarlar tizimlikini öz ichige alghan 190 mégabaytliq ashkarilan'ghan uchurni tehlil qilghan. Ularning qarishiche, bu melumatlar xitayning dunyaning herqaysi jayliridiki shexsler, hökümetler we teshkilatlarni nazaret qilish üchün qollan'ghan taktikisini bilishte kem uchraydighan uchurlar iken.

“Nyu-york waqit géziti” ning xewirige qarighanda, mezkur höjjetlerde yene xitay bolmighan milletlerdin bashqa tordiki qimar shirketlirini yéqindin közetkenlikige da'ir uchurlar melum bolghan.

Ashkarilan'ghan uchurlarda, xitay jama'et xewpsizliki ministirliqining asiyadiki tor oghriliqi herikitining bir qismi süpitide hökümet organlirigha we shexsiy shirketlerge qilghan hujumliri toghriliq muhim uchurlar bérilgen. Közetküchilerning ilgiri sürüshiche, bu ashkarilinish, washin'gtondiki yuqiri derijilik hökümet emeldarliri ichide endishe we teshwish peyda qilish éhtimali bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.