Xitay hökümiti yéngi kowid siyasiti arqiliq puqralirini talash-tartishqa sélip qoyghan

Xitay hökümiti 3 yildin buyan qollinip kelgen “Kowidni nölge chüshürüsh” qamal siyasitini bikar qilip, hemmini keng échiwetkendin kéyin téximu éghir kowid apitige yoluqqanidi. Bir-birige tamamen zit bolghan bu siyasetler we kélip chiqqan éghir aqiwetler xitay puqralirida qattiq ghulghula peyda qilghan.

“Nyu-york waqti” gézitining 11-yanwar xewer qilishiche, xitay puqraliri hökümetning hazirqi kowid siyasitige bolghan gumani we naraziliqini ipadilep, bir-biri bilen talash-tartish qilishqa bashlighan. Ularning munazire témisi “Hazir köpiyip ketken késel we ölüklerge kim mes'ul? hökümet mutexessislirining gépige ishen'gili bolamdu? doxturxanilarda késellik toshup ketken tursa, omikron dégen wirus hökümet emeldarliri dewatqandek adettiki wirusmu?” dégendek mesililer bolup, hökümetke ishenmeydighanlar bilen hökümetni yaqlaydighanlar ikki qutupqa bölünüp, jédel qilishqa bashlighan. Hökümet terepdarliri “Qamal siyasitige qarshi chiqquchilar bügünki apetke sewebchi” dése, hökümetke ishenmeydighanlar “Hökümet bu qamalni bikar qilishtin burunla wirus yamrap ketken” déyishken.

Xewerde tehlil qilinishiche, xitay hökümiti eslide iqtisadni eslige keltürüsh üchün puqralarni qoyuwetken, emma bu wirusta ölgenlerning sani köpeygenche iqtisadning janlinishi emelge ashmighan, belki ziyan köpeygen. Xitay hökümiti yéngi yilda puqralarni pojangza étishqa yol qoymighandin kéyin ghezeplen'gen puqralar saqchi mashinisini örüwetken؛ eger chaghandimu pojangza étish men'i qilinsa hökümet bilen amma otturisida téximu éghir toqunush chiqishi mumkin iken.