B b s: shi jinping 19-qurultayda qa'idini buzdi, siyasiy byuro izbazarsiz

Xitay komportiyesining 19-qurultiyi bügün yeni 25-öktebir küni yépildi. Xelq'ara xewerlerde déyilishiche, qurultayning échilishidin yépilishigha qeder jeryani we netijisi yeni shi jinpingning wezipisini dawam qilishi we hakimiyettiki ornini mustehkemlishi xelq'ara közetküchilerning kütkinidin perqliq bolmidi؛ peqet yéngidin teyinlen'gen siyasiy byuroda izbasar dep qaralghudek kishining bolmasliqi bir qisim közetküchilerni ejeblendürdi.

B b s ning bügünki bu heqtiki xewiride déyilishiche, axbarat saheside, shi jinping we li kéchyangning izbasari dep qarilip kéliwatqan 54 yashliq xu chünxu'a bilen 57 yashliq chén min'ér yéngi siyasiy byuro da'imiy komitétigha kirelmigen.

B b s ning xewiride déyilishiche, xitayda dawamliship kéliwatqan qa'ide boyiche xitay dölet re'isi we bash ministir ikki nöwetla wezipe ötishi, ikkinchi nöwetlik wezipe tapshuruwalidighan chéghida kéler nöwetlik izbasarliridin shepe bérishi kérek.

B b s da bu heqte pikir bayan qilghan xongkongluq mutexessisler siyasiy byuroning yéngi da'imiy hey'et ezaliri li jenshu, wang yang, wang xuning, jaw léji we xen jéng qatarliqlarning xitay hakimiyet qatlimida tesir küchi bolmighan kishiler ikenlikini ilgiri sürgen؛ ular yene bu ehwalning gerche shi jinpingning ornining mustehkemlinishige paydiliq bolsimu, emma siyasiy byuroning kolléktip rehberlik iqtidarida ajizliq shekillendürgenlikini eskertken.

Bezi közetküchiler shi jinpingning yéngi siyasiy byurogha yéshi 60tin halqighan we tesir küchi az shexslerni tallash arqiliq özige 3-qétim wezipe tapshuruwélish üchün yol échiwatqanliqini ilgiri sürse, yene beziler nöwettiki besh yilni saghlam dawamlashturush üchün ul salghanliqini otturigha qoyghan