Хитай рәиси ши җинпиң, "бөлгүнчилик" һәрикәтлиригә йол қоймайдиғанлиқини җакарлиди

Мухбиримиз әркин
2016-11-11
Share

Хитай рәиси ши җинпиң җүмә күни барлиқ хитайларни иттипақлишип, хоңкоң, тәйвән мустәқиллиқиғә қарши турушқа чақирған. У, бу сөзләрни хитай милләтчиликиниң атиси сүн җуңсән туғулғанлиқиниң 150 йиллиқ хатирә йиғинида қилған.

Хитай рәиси бу сөзләрни хоңкоң сиясий кризиси вә тәйвән мустәқиллиқ пикриниң күчийишигә қаритип ейтқан. У, әгәр тәйвән рәһбәрлири тәйвән билән хитай "бир җуңго" дегән пикирни қобул қилса, "биз улар билән алақә қилишни халаймиз" дегән.

Тәйвәндә бу йил 1‏-айдики сайламда ғәлибә қилип, һакимийәткә олтурған мустәқилчи президент сәй йиңвен гоминдаң билән компартийә 1992‏‏-йили һасил қилған тәйвән -хитай бир җуңго дегән пикирни қобул қилишни рәт қилған. Нәтиҗидә, бейҗиң һөкүмити тәйвән билән болған алақини тохтатқан иди.

Ши җинпиңниң алақзадә болушидики йәнә амил, хоңкоңдики сиясий кризис. Йеқинда хоңкоңда бәзи яш мустәқилчи сиясийонлар парламент әзалиқиға сайлинип, хоңкоңниң хитай земини икәнликини рәт қилған иди.
Бейҗиңпәрәс бәзи көзәткүчиләр, әгәр хоңкоңда мустәқилчиләргә йол қоюлса, бу кәлгүсидә тибәт вә уйғур аптоном районлуқ хәлқ қурултийида мустәқиллиқ тәлипиниң оттуриға қоюлушиға үлгә яритип беридиғанлиқини илгири сүргән.

Ши җинпиң җүмә күни хәлқ сарийида өткүзүлгән йиғинда йәнә, "һәрқандақ киши, һәр қандақ орган, һәрқандақ партийәниң һәрқандақ вақитта вә һәрқандақ усулда хитайниң һәрқандақ бир парчисини бөлүп чиқип кетишигә һәргиз йол қоюлмайду" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт