Xitaydiki wirus wabasi dunyani endishige salmaqta

Muxbirimiz eziz
2022.12.20

Xitaydiki wirus wabasining yéqin kelgüside ghayet zor dolqun teriqiside pütkül xitayni qaplaydighanliqi, buningda az dégendimu xitay nopusining 60 pirsenti wirus bilen yuqumlinip bir milyonche kishining ölüsh éhtimalliqi barliqi melum bolghandin kéyin buning dunyagha körsitidighan tesiri herqaysi hökümetlerni endishige sélishqa bashlidi.

Roytérs agéntliqining 19-dékabirdiki xewiride éytilishiche, amérika tashqi ishlar ministirliqi xitay hökümitini tajsiman wirus wabasining hazirqi ehwalini yoshurmastin élan qilishqa chaqirghan. Shuningdek buning yalghuz xitayningla mesilisi emes, belki dunyawi mesile ikenlikini tekitligen. Tashqi ishlar ministirliqining bayanatchisi néd prayis (Ned Price) bu heqte söz qilip “Tajsiman wirusqa qarshi mustehkem teyyarliqning bolushi yalghuz xitay üchünla emes, yene dunya üchünmu yaxshiliqtin dérek béridu” dégen.

Xitay hökümiti tajsiman wirus tüpeylidin ölgen tunji kishi heqqidiki xewerni 19-dékabir élan qilghan bolsimu bu sanning qattiq tekshürüshtin ötkendin kéyin élan qilin'ghan melumat ikenliki, emiliy sanning buningdin bekla köp ikenliki heqqide uchurlar otturigha chiqqan. Ijtima'iy taratqularda xitaygha dangliq béyjing opéra artisi chu lenlenning 19-dékabir küni wirustin yuqumlinip béyjing shehiride ölgenliki, uning bu yil 40 yashqa kirgenliki heqqidiki ishenchlik xewer tarqalghan.

Roytérs agéntliqining 20-dékabirdiki xewiride éytilishiche, nöwette xitaydiki doxturxanilar késel bilen tolup ketken bolup, doxturxana kariwitining yétishmesliki pütkül xitay boyiche ortaq mesilige aylan'ghan. Bolupmu ötken birnechche ay izchil dawam qilghan qamal we acharchiliq tüpeylidin salametliki bekla ajizlap ketken nechche yüz milyon kishidin qanchilik ademning mushu qétimliq zor dolqunda hayatidin ayrilishi herqaysi sahe eng köngül bölüwatqan mesililerdin bolup qéliwatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.