Хитай хаккерлириниң америка сода министири гина раймондониң тор һесабиға киргәнлики мәлум болған

Вашингтондин мухбиримиз ирадә тәйярлиди
2023.07.13

Америка сода министерлиқиниң министири гина раймондо (Gina Raimondo) вә америка ташқий ишлар министирлиқиниң юқири дәриҗилик әмәлдарлириниң хитай хаккерлириниң америка һөкүмәт органлириға қаратқан йеңи һуҗуминиң тәсиригә учриғанлиқи мәлум болған.

Хитай хаккерлириниң бу йил 5-айниң оттурилирида америка ташқий ишлар министирлиқини өз ичигә алған бир қанчә һөкүмәт оргининиң тор системисиға һуҗум қилғанлиқи вә оғриланған кимлик учурлири арқилиқ бир қисим әмәлдарларниң елхәтлиригә кирмәкчи болғанлиқи ашкариланған иди.

“вал-ситрит журнили” гезитиниң хәвиригә қариғанда, бу һуҗум тоғрилиқ йәниму илгириләп елип берилған тәкшүрүшләрдә америка сода министири гина раймондо һәм шундақла ташқий ишлар министирлиқиниң бир қисим юқири дәриҗилик әмәлдарлириниң елхәтлириниң һуҗумға учриғанлиқи мәлум болған. Бу саһәдики мутәхәссисләрниң дейишичә, бу әмәлдарларниң мәхпийләштүрүлгән тор һесабати системисиға суқунуп кириш пәвқуладдә техникилиқ тәҗрибә тәләп қилидиған болуп, бу хитай хаккерлириниң мурәккәп һуҗумларни тәшкилләш иқтидарини намаян қилип беридикән.

Америка ташқий ишлар министирлиқи болса бу һәқтики бу һуҗумда министирлиқниң бир қисим әмәлдарлириниң һесаблири һуҗумға учриған болсиму, әмма бу хаккерларниң дөләт бихәтәрликигә мунасивәтлик муһим учурларға еришәлмигәнликигә ишинидиғанлиқини ейтқан. Микрософт ширкити өзлириниң буниңға қарши тәдбир қолланғанлиқини билдүргән.

Мәлум болушичә, бу хаккерлиқ һуҗуми бу йил 6-айда америка ташқий ишлар министири антоний биллинкенниң 5 йилдин буян тунҗи қетим хитайға қаратқан рәсмий зиярити алдида йүз бәргән. Улар американиң һөкүмәт орунлирини өз ичигә алған 20 нәччә органниң елхәт һесабиға һуҗум қилған болуп, бу һәқтики тәкшүрүшләр давам қилмақтикән.

Хитай ташқий ишлар министерлиқиниң баянатчиси, бу хаккерлиқ һуҗуми һәққидики әйибләшләрни рәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.