Xitay hökümiti xakkérlirining tor éqimi eswabi bolghan rotérdin paydilan'ghanliqi ashkarilandi

Washin'gtondin muxbirimiz jewlan teyyarlidi
2023.09.28

Xitay hökümiti meblegh chiqirip tereqqiy qilduruwatqan tor xakkérliri tor éqimini yönlendürüsh eswabi rotérdin paydilinip, amérika, yaponiye qatarliq döletlerning xelq'ara shirketlirining torigha kirgen.

Amérikadiki “Tor bixeterliki heptiliki” torining 27-séntebir küni élan qilghan bu xewiride éytilishiche,  Cisco shirkitining rotérlirigha xitay hökümiti meblegh salghan “Qara téxnika” (Black tech) ishlitilgen bolup, uninggha “Yuqiri sewiyelik sijil tehdit” (APT) yoshurun'ghan. Buni amérika dölet xewpsizliki idarisi (NSA) bilen amérika fédératsiye tekshürüsh idarisi (FBI) tekshürüp bayqighan.

Bu organlar agahlandurup mundaq dégen: “Konkrét éytqanda, ‛qara téxnika‚ tor hujumchisi melum tor békitini nishan'gha élip, bashqurghuchilarning hoquqi chekleshni meqset qilghanda rotérni özgertip, uni merkez qilghan tor herikitige soqunup kiriwalidu”.

Cisco Shirkitining rotérlirigha yoshurun'ghan tor hujumchisi chet el shirketlirining tor sistémisini buzuwétishni emes, ulardin uchur oghrilashni meqset qilidiken.

Xitayning ‛qara téxnika‚ din paydilinip yuqiri sewiyede tor bixeterliki xewpi peyda qilishi 2010-yildin buyan janlinip ketken hadise bolup, uning hujum nishani hökümet, sana'et, téxnika, taratqu, éléktiron we télégraf saheliri, shundaqla amérika bilen yaponiye armiyesini arqa septin teminleydighan shirketlerni öz ichige alidiken.

Cisco Shirkiti özlirini aqlap, “Cisco Ning kemchilikini körsitidighan héchqandaq alamet körülmidi. Tor hujumchiliri ishenchlik tor kélishimidin paydilinip, tor bashqurghuchiliri we yumshaq détallarni özgertishke urun'ghan” dégen.

Halbuki, xewerde körsitilishiche, qattiq détal xewpsizliki mutexessisliri yuqiri sewiyelik tor hujumchilirining rotér qatarliq eswablarning sayiside uzun muddetlik we mexpiy tor hujumi qilidighanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.