Xitay xelq qurultiyi dölet ishliri kabéntining hoquqini ajizlitidighan bir qanun maqullighan

Xitayning xelq qurultiyi we siyasiy kéngesh yighini axirlashqan 11-mart küni xitayning bir qanunigha tüzitish kirgüzülgen bolup, bu arqiliq xitay kompartiyesining dölet ishliri kabénti (gowuyüen) ni kontrol qilish hoquqi téximu kéngeygen. Bu qétimqi ikki yighinda xitay  bash ministirining li chyangning muxbirlarni kütüwélish yighini ötküzüshi emeldin qaldurulghan bolup, bu xitay dölet ishliri kabéntining 30 yilliq tarixida tunji qétim körülgen ish iken.

“Ruytérs agéntliqi” ning 12-mart küni bergen xewiride éytilishiche, xitay xelq qurultiyining yépilish murasimida awazgha qoyulghan bu “Dölet ishliri kabénti teshkili qanuni” mutleq köp awaz bilen maqullan'ghan. Xitay kompartiyesining yéqinqi yillardin béri yolgha qoyghan yéngi tedbirliri asasen dölet ishliri kabéntining hoquqini ajizlitishqa merkezleshken bolup, hazirqi bash ministir li chyang peqet hökümettiki 21 ministirliq we yerlik hökümetlerge qaranchuq qilip qoyulghan. Qanun mutexessislirining bildürüshiche, yéngidin tüzitish kirgüzülgen bu “Dölet ishliri kabénti teshkili qanuni” 1982-yildin buyan xitay kompartiyesige eng köp hoquq bérilgen qanun hésablinidiken, bu arqiliq hökümet partiyege mutleq boysunidighan weziyet shekillen'gen.

Yéngidin özgertilgen bu qanunning nizamnamiside, dölet ishliri kabéntining kompartiye merkiziy komitétning nopuzi we bir tutash rehberlikini qet'iy himaye qilidighanliqi, shi jinping idiyesige emel qilidighanliqi, diplomatiyedin tartip medeniyet sahelirigiche bu idiyeni yétekchi qilidighanliqi tekitlen'gen.