Uyghurlar diyaridiki mislisiz "Bixeterlik xirajiti" diqqet qozghidi
Xitay hökümitining Uyghurlar diyaridiki "Muqimliq" we "Bixeterlik" üchün ghayet zor sanda xirajet serp qiliwatqanliqi alaqidar axbarat wasitilirining we mutexessislerning diqqitini qozghidi.
"Jéymis tawn fondi" ning bashqurushidiki "Xitay xewerliri" zhurnilining 12-marttiki sanida élan qilin'ghan bu heqtiki maqalida xitay hökümitining Uyghurlar diyaridiki meblegh serpiyatining mezmuni hemde buninggha alaqidar mesililer tepsiliy bayan qilinidu.
Adryan zénz imzasidiki maqalida körsitilishiche, 2017-yilida xitay hökümitining Uyghurlar diyaridiki bixeterlik xirajiti 57 milyard som (texminen 9.5 Milyard amérika dolliri)din éship ketken. Halbuki bu san 2016-yili 30 milyard som bolghan iken.
Maqalida körsitilishiche, bixeterlik xirajitining bundaq zor miqdar we sür'et bilen éshishi asasen Uyghurlar diyarigha partiye sékrétari bolup yötkilip kelgen chén chu'en'go bilen biwasite munasiwetlik iken. Shuning bilen birge bu xil éshish sür'iti xitayning özidiki ichki bixeterlik xirajitining dölet mudapi'esi üchün ajritilghan xirajettin zor derijide éship kétish yüzlinishi bilen barawer yönilishte ashmaqta iken. Bu heqte alaqidar melumatlar xitayning ichki bixeterlik xirajitining emeliy qimmiti amérikining shu xildiki xirajitining bir hessisidin éship ketkenlikini körsetmekte iken.
Aptorning bayanlirigha qarighanda, Uyghurlar diyaridiki bixeterlik xirajitining bir yil ichide 92 pirsent ashqanliqi xitayda misli körülmigen ehwal iken. Oxshash mezgil ichide xitayning bashqa ölkiliride, jümlidin tibet, chingxey qatarliq jaylarda bu san asasen 10 pirsent etrapida bolmaqta iken.
Mutexessislerning pikirlirige qarighanda, xitay hökümiti nöwette ijra qiliwatqan "Bir belwagh bir yol qurulushi" xitay hökümitining eng chong kozirliridin biri bolup, Uyghurlar diyarining "Muqim" bolush-bolmasliqi bu qurulushning ghelibe qilish yaki meghlup bolushida achquchluq rol oynaydiken. Shu sewebtin chén chu'en'goning mezkur rayonni ismi-jismigha layiq "Üsti ochuq türme" ge aylandurushi béyjingdiki merkiziy hökümetning zor küch bilen qollishigha érishmekte iken.
- Mehmud qeshqeri qatarliq 3 neper meshhur shexsning Uyghur diyaridiki heykelliri éliwétilgen
- Hindonoziye türmisidiki exmet boz'oghlan: "Soraqta qéyin-qistaqqa uchriduq, özimiz chüshenmigen qeghezlerge qol qoyduq"
- Shungqar boldung, shungqardek yashap
- "Xorlan'ghan wijdan" filimi xorluqta qalghan bir milletning awazi boldi
- Dangliq naxshichi we kompozitor mehmut sulaymanning tuyuqsiz wapati Uyghurlarni qayghugha saldi
