Японийә хитай кемилириниң сенкаку арилиға йеқинлашқанлиқиға наразилиқ билдүрди

Мухбиримиз меһрибан
2016.08.09

Японийә ташқи ишлар вәзири фумийо кишида 9-авғуст әтигән хитайниң японийәдики баш әлчиси чең юңхуани чақиртип, 8-авғуст күни хитайниң вәзипә иҗра қиливатқан кемилириниң японийәгә тәвә сенкако арилиға йеқин деңиз тәвәликигә киргәнликигә наразилиқ билдүргән.

Әнглийә б б с агентлиқиниң бу һәқтики хәвиридә нәқил елишичә, бу японийәниң хитайниң японийәдики баш әлчисини бәш күн ичидә иккинчи қетим чақиртиши вә әң юқири дәриҗилик һөкүмәт әмәлдариниң наразилиқ билдүрүш вәқәси болуп, японийә ташқи ишлар вәзири сөзидә, японийә -хитай мунасивити һазир “көрүнәрлик яманлишишқа қарап йүзләнмәктә” дегән.
Америка авазиниң хәвиридә ейтилишичә, хитай баш әлчиси японийә ташқи ишлар министирлиқидики көрүшүштин кейин мухбирға ейтқан сөзидә сенкако арилиниң хитай земини икәнлики, шуңа японийәниң хитай парахотлириниң мәзкур деңиз тәвәликигә кириши мәсилисидә ғодуримаслиқи керәкликини ейқан.

Японийә таратқулири хәвәрлиридин мәлум болушичә, 8-авғуст күни хитайниң 14 данә кемиси сенкако арилиға йеқин деңиз тәвәликигә киргән. японийә таратқулири бу, йеқинқи йиллардин буян әң көп сандики хитай кемилириниң мәзкур аралға әң йеқин деңиз тәвәликигә кириши болуп һесаблинидикән.

Сенкако араллириниң игилик һоқуқи мәсилиси узундин буян икки дөләт арисида талаш-тартиш үстидә турмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.