Хитай һөкүмити роһинга мусулманлириға ярдәм қилмақчи

Мухбиримиз әзиз
2018-06-29
Share

Хәлқара ахбарат саһәсидики әң қизиқ темилардин болған бермадики роһинга мусулманлириниң қирғин қилиниш вәқәси пәскойға чүшкәндә хитай һөкүмити бүгүн өзлириниң роһинга мусулманлириға инсанпәрвәрлик ярдимидә болмақчи икәнликини билдүрди.

Бирләшмә агентлиқниң 29-июндики хәвиридин мәлум болушичә, хитай ташқи ишлар министири ваң йи бүгүн (җүмә күни) бенгал ташқи ишлар министири обул һәсән мәхмуд билән бейҗиңда сөһбәттә болғандин кейин өзлириниң роһинга мусапирлириға ярдәмдә болидиғанлиқини билдүргән. У бу һәқтә сөз қилип "бенгал һөкүмити еһтияҗлиқ болған инсанпәрвәрлик ярдәмлиригә тегишлик һәссә қошушни халаймиз," дегән. Обул һәсән мәхмуд өзлириниң роһинга мусулманлирини бенгалдин бермаға қайтурушқа мунасивәтлик хизмәтләрдә өзара һәмкарлишиш тоғрилиқ тәпсилий сөһбәтләшкәнликини ейтқан.

Мәлум болушичә, хитай һөкүмитиниң бу қарари дуня банкиси бенгалдики роһинга мусапирлириға 480 милйон америка доллирилиқ маддий ярдәм беришни елан қилишиниң әтисигә тоғра кәлгән. Ройтерс агентлиқиниң мәлуматлириға қариғанда, һазир бенгалниң кокс базири районида аз дегәндиму 700 миңдин артуқ роһинга мусулманлири панаһлиниватқан болуп, буни дуня бойичә әң чоң мусапирлар лагери, дейишкә болидикән.

Роһинга мусулманлириниң бермадики "етник қирғинчилиқ" тин қошна болған бенгалға зор көләмдә қечип келиши билән берма һөкүмити хәлқараниң қаттиқ әйиблишигә учриған. Әмма б д т ниң алақидар йиғинлирида хитай вәкиллири роһинга мусулманлири дуч кәлгән "етник қирғинчилиқ" ни етирап қилмиған иди. Әмдиликтә уларниң бирдинла "шәпқәтчи" қияпитидә оттуриға чиқиши һәққидә сөз қилған анализчилар "хитай бу арқилиқ хәлқараниң көзини бойимақчи, шундақла мусулманлар дунясини йәнә бир қетим алдимақчи," деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт