Xitay da'iriliri: “Xitay, yawro-asiya döletlirining iqtisadiy we soda hemkarliqini chongqurlashturushta aktip rol oynaydu”

“Shinjang géziti” ning 6-ayning 12-künidiki xewirige asaslan'ghanda, xitay soda ministirliqi, xitay tashqi ishlar ministirliqi, xitay xelq'ara sodini ilgiri sürüsh komitéti we Uyghur aptonom rayonluq xelq hökümitining qollishi bilen “Yipek yolidiki yéngi pursetler, asiya we yawropadiki yéngi hayatiy küch” témisidiki 8-nöwetlik xitay-yawro-asiya yermenkisi 26-iyundin 30-iyun'ghiche ürümchide ötküzülidiken.

 Xitay-yawro-asiya körgezmisige quyulidighan mehsulatlar énérgiye, reqemlik téxnika, medeniyet sayahetchiliki, ashliq we néfit, organik méwe we köktat mehsulatliri shuningdek yene, charwichiliq, paxta we toqumichiliq mehsulatliri qatarliqlarni öz ichige alidiken. Bu yermenkige qatnashquchilarning da'irisi keng, qatnishish nisbiti yuqiri bolup, xitay soda ministirliqi da'irilirining öz metbu'atlirigha bildürüshiche, 50 dölet, rayon we xelq'araliq teshkilat, 30 ölke, aptonom rayon, merkezge biwasite qarashliq sheher, shinjang ishlepchiqirish we qurulush bingtüeni we aptonom rayondiki 14 wilayet, sheherdin kelgen 1000 din artuq shirket hem organ yermenkige qatnishidiken.

Amérika hökümiti Uyghur mejburiy emgiki bilen ishlepchiqirilghan mehsulatlarning amérika bazirigha kirishining aldini alghandin kéyin xitayning Uyghur élini soda, énérgiye, ashliq bazisi, shundaqla muhim iqtisadiy tügün qilip qurup chiqish qedimini tézletken. Shuningdek yene ottura asiyadin yawropagha, jenubiy asiyadin ottura sherq we afriqa döletlirigiche sozulghan ghayet zor “Bir belbagh bir yol” qurulushni téximu tézletken idi. Bu qétimqi xitay-yawro-asiya yermenkisi xitayning Uyghur élini soda we iqtisadiy tügün qilip qurup chiqish, ottura sherq, afriqa we yawropa döletlirige mal sétish, bu rayonlardiki iqtisadiy tesirini kéngeytish üchün élip bérilghan bir pa'aliyet dep qaralmaqta.