Yawropa ittipaqining yuqiri derijilik emeldarliri shi jinping bilen körüshken, biraq körünerlik netije hasil qilalmighan

Washin'gtondin muxbirimiz irade teyyarlidi
2023.12.07

Yawropa ittipaqining yuqiri derijilik emeldarliri 7-dékabir peyshenbe küni béyjingda xitay kompartiyesining bash sékrétari re'isi shi jinping bilen körüshüp, ikki terep arisidiki soda tengpungsizliqi, kishilik hoquq, ukra'ina mesilisi qatarliq bir qatar mesililer üstide söhbetleshken.

Yawropa ittipaqi komitétining re'isi ursula won dir lin we yawropa kéngishining re'isi charléz mishél qatarliqlarning xitay ziyariti bashlinish aldida herqaysi kishilik hoquq organliri bayanat élan qilip, ularni Uyghurlar mesilisini otturigha qoyushqa, bolupmu rahile dawut, ilham toxti qatarliq ömürlük qamaqtiki kishilerning qoyup bérilishini telep qilishqa chaqirghan idi.

Yawropa ittipaqi hey'iti 7-dékabirdiki uchrishishtin kéyin élan qilghan yazma bayanatida, “Özlirining xitaydiki kishilik hoquq weziyiti, bolupmu Uyghur éli we tibettiki sistémiliq kishilik hoquq depsendichiliki, mejburiy emgek mesilisi heqqidiki endishilirini qayta tekitligenlikini we xitayni wedilirige emel qilishqa chaqirghanliqini” bildürgen.

Yawropa ittipaqi komitéti radiyomizning bu heqtiki so'allirigha qayturghan inkasida, yawropa ittipaqining xitay bilen bolghan her derijilik uchrishishlarda dawamliq halda Uyghur mesilisi, jümlidin xitayning kishilik hoquq xatirisini tilgha élip kelgenlikini eskertken.

Roytérs agéntliqining xewirige qarighanda, yawropa ittipaqining bu ziyarette hel qilmaqchi bolghan asasliq mesilisi, xitay bilen bolghan sodidiki tengpungsizliqni tügitish iken. Biraq uchrishishta sodidiki ziddiyetni hel qilishqa munasiwetlik konkrét qedem étilmighan iken. Ikki terep yene rusiyening ukra'inagha qaratqan tajawuzchiliq urushini toxtitish mesilisidimu bir ilgirilesh hasil qilalmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.