Da'irilerning sichüen ya'endiki yer tewreshte insanperwerlik yardemni ret qilishi her xil inkaslarni qozghidi


2013.04.23
Share on WhatsApp
Share on WhatsApp

Radi'omiz igiligen uchurlar we en'gliye b b s agéntliqi qatarliq xelq'ara metbu'atlarning xewerliridin melum bolushiche, sichüenning tibetler we xitaylar arilash olturaqlashqan ya'en shehiride 20 - aprél yüz bergen 7 bal yer tewreshtin kéyin, shu jay waqti 23 - april seyshenbe küni kéchigiche apetke uchrighan ahale 40 mingdin ashqan.

Ölgenler 193 neperge, yoqap ketkenler25 neperge, yarilan'ghanlar 12 ming 211 neperge yetken. Apet rayonida su, yimek, chédir qatarliq nersilerge bolghan éhtiyaj éship, kéreklik yimeklik we esliheler yétishmigenliki üchün rayonda naraziliq yüz bergen.

Melum bolushiche, lushen nahiyilik hökümet apet rayonigha yardemge kelgenlerni saqchilarni ewetip tosqan we ulargha apet rayoni taghliq rayon bolghini üchün kirish qolaysizliqini bildürgen. Xitay hökümiti, xelq'ara jem'iyet, ijtima'i teshkilat we shexslerning apetke uchrighanlargha bérilidighan insanperwerlik yardemlerni qobul qilmaydighanliqini bildürgendin kéyin, xelq'arada bu ehwalgha qarita türlük inkaslar qozghaldi. Radi'omiz igiligen uchurlardin melum bolushiche, apet rayonigha yardem üchün kelgen kishilik hoquq pa'aliyetchisi xu'ang chi qatarliqlar we chéngdudin yardem üchün kelgen nurghunlighan tibetler apet rayonigha kirgüzülmigen.

Kishilik hoquq pa'aliyetchisi xu'ang chi bundin besh yil ilgiri yeni 2008 - yili sichüenning wénchüen nahiyiside yüz bergen 70 ming adem ölgen qattiq yer tewreshte, shu jaydiki mektepler qurulushining ölchemsizliki sewebidin nurghun oqughuchilarning bina bésiwélip ölgenlikini ashkarilighanliqi üchün 3 yilliq qamaq jazasigha höküm qilin'ghan idi.Xu'ang chi ependi bügün b b s agéntliqining ziyaritini qobul qilghinida, da'irilerning bu qétim yüz bergen yer tewreshte xelq'araning yardimini ret qilishidiki seweb heqqide toxtilip, da'irilerning rayondiki setchiliklerning xelq'aragha ashkarilinip kétishini xalimighanliqi üchün, sirtning yardimini ret qilghanliqini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.