Бейҗиңда ечиливатқан 3-омумий йиғин мәзгилидә хитай әрздарлириниң намайиши үзүлмиди

Мухбиримиз меһрибан
2013.11.12

9-Ноябир шәнбә күни бейҗиңда башланған хитайниң 18-нөвәтлик 3-омумий йиғини 12-ноябир сәйшәнбә күни аяғлашти. Гәрчә даириләр йиғин мәзгилидә һәрқайси җайларда қаттиқ бихәтәрлик тәдбирлири алған болсиму, әмма хитай әрздарлириниң бейҗиң, гуаңҗу қатарлиқ шәһәрләрдә наразилиқ намайишлири елип барғанлиқи мәлум болди.

Йиғин мәзгилидә қаттиқ бихәтәрлик тәдбирлири елинған, әмма 9-ноябирдин башлап бейҗиң, шаңхәй, гуаңҗу қатарлиқ шәһәрләрдики әрзийәт идарилири қатарлиқ җайларға йиғилған әрздарлар һәр хил тәшвиқат тахтилирини көтүрүп, үнлүк авазда шоар товлап, хитай мәркизи һөкүмитини нөвәттики қануний түзүмлирини өзгәртишкә, пуқраларниң һалиға йетишкә, әмәлдарларниң мал-мүлкини авамға ашкарилап, парихор әмәлдарларни җазалашқа чақирған.

Хитай пуқралири вә хәлқара җәмийәт, бу қетим бейҗиңда ечилған 18-нөвәтлик 3-омумий йиғинида хитайда йеңи бир ислаһат қәдиминиң елинишини арзу қилған болсиму, әмма хитай вәзийитини көзәткүчиләр, чәтәл мәтбуатлири вә чәтәлләрдики хитай демократлири тор бекәтлиридә өз қарашлирини оттуриға қоюп, ши җинпиң һөкүмитиниң бу нөвәтлик йиғинда хәлқи арзу қилғандәк ислаһат тәдбирлирини йолға қоймиғанлиқини илгири сүрүп, хитайниң йеңичә ислаһат тәдбири алмиғанлиқини, хитайда нөвәттә йүргүзүлүватқан мустәбит һөкүмранлиқниң йәнила давамлишип, демократик идийиләргә қаритилған тәқиб қилиш техиму күчәйтилиши мумкинликини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.