Pirézidént baydén: xitay yasighan aptomobil yumshaq détalliri amérikaning dölet xewpsizlikige tehdit

Amérika pirézidénti jow baydén xitayda ishlepchiqirilghan we aptomobillargha ornitilidighan yumshaq détallarning amérikaning dölet bixeterlikige tehdit peyda qiliwatqanliqini bildürgen. U, amérika soda ministirliqini bu yumshaq détallar üstidin mexsus tekshürüsh bashlashqa buyrughan.

“Wal-sitrit zhurnili” ning bu heqtiki xewiride éytilishiche, prézidént baydén 29-féwral künidiki sözide mundaq dégen:

“Xitayning yershari aptomobil sana'itige hökümranliq qilish urunushi amérikagha éniqla bixeterlik xewpi élip kelmekte. Chünki yumshaq détal arqiliq tutashturulghan aptomobillar bizning puqralirimiz we ul eslihelirimizge munasiwetlik sezgür sanliq melumatlarni yighip, bu sanliq melumatlarni xitaygha eweteleydu. Bundaq aptomobillarni yiraqtin kontrol qilghili we ishlimes qilip qoyghili bolidu.”

Xewerde déyilishiche, bu tekshürüsh buyruqi baydén hökümitining amérika sana'itini xitayning künsayin küchiyiwatqan tor hujumi tehditidin qoghdash heriketlirining biri bolup, u, amérikadiki mashinilarda bezi zapchaslarni ishlitishke chek qoyushni keltürüp chiqirishi mumkinken.

Prézidént baydén bayanatida, amérika soda ministirliqining tekshürüsh arqiliq eger chet'el hökümetliri aptomobil sistémisidiki sanliq melumatlargha érishken teqdirde kélip chiqish éhtimali bolghan xewpler üstide izdinidighanliqini bildürgen.

Melum bolushiche, hazirqi zamaniwi téxnikilar bilen yasap chiqilghan mashinilar yumshaq détallar bilen kompyutérgha ulinidighan bolup, u sénzor, ep we kaméra arqiliq nurghun uchurlarni topliyalaydiken.

Aldinqi hepte, baydén hökümiti yene amérikaning déngiz bixeterlikini qoghdashqa 20 milyard dollardin artuq meblegh sélish pilanini jakarlighan bolup, umu amérikaning portlirida qolliniliwatqan xitay yasighan ilghar yumshaq détallargha ige kiranlarning dölet bixeterlikige élip kélidighan tehditini chiqish qilghaniken.