Xitay kishilik hoquq adwokatlar jem'iyiti yéngi yilliq tebrik sözi: "Kéche tügep haman tang atidu"

Muxbirimiz méhriban
2015-12-31
Share

Xitay kishilik hoquq adwokatlar jem'iyiti 2015-yil 31- dékabir" Kéche tügep tang atidu" serlewhilik yéngi yilliq tebrik sözi élan qildi.

Xitay kishilik hoquq adwokatlar jem'iyiti xitaydiki ammiwi teshkilat bolup, teshkilatning xongkongdiki ishxanisi 31-dékabir élan qilghan yéngi yilliq tebrik sözide,"Kishilik hoquq adwokatliri üchün 2015 yil eng musheqqetlik yil boldi, yénimizdiki dostlirimiz türmilerge qamaldi, qorqunch we qabahet etrapimizda aylinip yüridighan weziyet shekillendi. Da'irilerning basturushi chékige yetti, emma purset yenila jeng élan qilish arqiliq qolgha kélidu. Kishilik hoquq adwokatliri bésim we qorqutush aldidimu iradisidin qaytmidi, ular yenila kishilik hoquq we qanunni qoghdashning  aldinqi sépide kétiwatidu. Dewrning chong özgirishi aldidiki bu kéchide, kishilik hoquq adwokatliri hergiz qol qoshturup turghuchilardin bolmaydu. Belki étish aldidiki güzel tangni kütüwélish üchün, erkinlik yolidiki musheqqet we japani quchaqlighiniche, yépyéngi kélechekni izdeydu!" dégen sözler yézilghan.

31- Dékabir küni yene bultur xitay hökümiti teripidin " Döletni parchilash jinayiti" bilen muddetsiz qamaq jazasigha höküm qilin'ghan meshhur Uyghur öktichi ziyaliysi ilham toxtining adwokatliridin liyu shawyüen ependimu yéngi yilliq tebrik sözi yézip, " 2015-Yil bilen xoshlishish aldida turuptuq, birdin-bir arzuyimiz tutqun qilin'ghan kesipdashlirimizning yéngi bir yilda tinch-aman qaytip kélishini tilesh!" dégen.

2015-Yili 7-ayning 10- künidin 12- königiche xitay j x ministirliqi herqaysi jaylarda kishilik hoquq adwokatlirini tutqun qilish weqesi yüz bergen. Ikki kün ichidila 240 neper  kishilik hoquq adwokati tutqun qilinip, 100 din artuq adwokat soraq qilin'ghanliqi xewer qilin'ghan.

Kéyin bir qisim adwokatlar qoyup bérilgen bolsimu, yenila nurghun adwokatlar ning xitay türmiside ikenliki ilgiri sürülmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet