Xitay bir qisim atalghularni metbu'atlarda ishlitishni cheklidi

Muxbirimiz ümidwar
2017-07-23
Share

Yéqinda xitayning shinxu'a agéntliqi mexsus uqturush tarqitip, xitay hökümet axbarat wasitiliride "Teywen prézidénti", "Jungxu'a min'go", "Xitay-xongkong", "Xitay-awmén" dégendek bir yürüsh atalghularni ishletmeslikni belgiligen.

Amérika awazining bu heqtiki xewiridin melum bolushiche, xitay merkizi hökümitining organ metbu'ati hésablinidighan shinxu'a agéntliqining mezkur "Atalghular cheklimisi" we "Söz ishlitishte éhtiyatchan bolush" qarari boyiche alghanda, teywen'ge nisbeten "Jungxu'a min'go" we "Teywen prézidénti" dégen atalghularni ishletmeslik, buning ornigha "Teywen" we "Teywen rayoni rehbiri" dégen atalghularni qollinish, teywenning dunya soda teshkilati qatarliq xelq'araliq teshkilattiki ezaliqini atighanda, "Eza dölet" atalghusini emes, belki "Ezasi" dégen atalghuni qollinishi békitilgen.

Xitayning "Jungxu'a min'go" we "Teywen prézidénti" atalghulirini ishletmeslik mesiliside teywen terep öz tenqidiy meydanini bildürgen bolup, teywen terep xitaydin "Jungxu'a min'go" ning mewjutluqidin ibaret pakitni étirap qilishni telep qilghan.

Tarixi nuqtidin qarighanda, jang keyshi rehberlikidiki jungxu'a min'go, yeni xitay jumhuriyiti hökümiti ichki urushta meghlup bolup, 1949-yili teywen ariligha köchüp bérip öz hakimiyitini dawamlashturuwergen. Jungxu'a min'go hökümiti taki 1971-yilighiche b d t ning ezasi bolup, shu yili uning ornini xitay xelq jumhuriyiti igiligen idi. Teywen hökümiti taki hazirghiche özini yenila resmiy shekilde "Jungxu'a min'go", yeni "Xitay jumhuriyiti" dep atimaqta. 

Xitay öz metbu'atlirida burundin tartip bir yürüsh sezgür atalghularni cheklep kéliwatqan bolup, bular Uyghurlar, tibetler we mongghullarning milliy-siyasiy heriketliri bilen munasiwetliktur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet