Хитайда “чәтәлликтин қорқуш” хаһиши ямримақта

Мухбиримиз әзиз
2020-03-31
Share

Хитай һөкүмитиниң вухән шәһиридин башланған таҗсиман вирусниң мәнбәсини чәтәлдин издәш урунушлириниң бир мәзмуни дөләт ичидә бу һәқтики бу хилдики тәшвиқатқа көпләп орун бериштә әкс әткән иди. Нөвәттә буниң рошән үнүмигә еришкәнлики түрлүк шәкилләрдә көрүлмәктә.

“муһапизәтчи” гезитиниң 30-марттики мақалисидә ейтилишичә, хитай һөкүмитиниң “явропа вә америкада таҗсиман вирусниң шиддәт билән ямрап кәткәнлики, шу сәвәбтин хитай чеграсиниң чәтәлдин келидиған саяһәтчиләргә тақалғанлиқи” һәққидики тәшвиқатлири хитай пуқралири арисида көк көз вә сериқ чач кәлгән чәтәлликләрни көрүп қалса бәдәр қачидиған күлкилик вәзийәтни яратқан. Йәнә келип хитай һөкүмитиниң “биздә вирустин юқумланған йеңи бимарларниң һәммиси чәтәлдин кәлгән кишиләр” дегән мәзмундики хәвәрлири бу һадисигә техиму зор сәлбий мәниләрни қошқан. Буниң билән бир қисим җайлардики ресторанлар, магизинлар вә меһманханиларда бир қисим хитайларниң чәтәлликләрни көрсә уларға һақарәт қилиштәк қилмишлириму йүз бәргән.

Бейҗиңдики бир америкалиқ оқуғучи бу һәқтә сөз қилип “бағчида балисини йетиләп келиватқан бир аял мени көрүпла балисини көтүргиничә қечип кәтти,” дегән. Йеқиндин буян хитайдики бир қисим иҗтимаий таратқу бәтлиридә “чәтәллик әхләтләрдин тарқилиш алдида туруватқан иккинчи қетимлиқ вирус баласидин һошяр болайли” дегәндәк шоарлар көпийип қалған.

Мақалида ейтилишичә, хитай һөкүмити таҗсиман вирусниң мәнбәсиниң чәтәл икәнликини зор күч билән тәшвиқ қиливатқанлиқтин хитай пуқралири арисида чәтәлликләрдин қорқидиған, улардин өзини тартидиған яки уларға ишәнмәйдиған бир омумий кәйпият шәкилләнмәктә икән. Болупму хитай һөкүмити “чәтәлликләр чеградин киришкә болмайду” дегән бәлгилимини иҗра қилишқа башлиғандин буян бу һал техиму еғирлашқан.

Бейҗиңда яшаватқан америкалиқ тарихшунас җеремей җенни бу һәқтә сөз қилип: “әгәр йеқин кәлгүсидә вирусни әйибләш тоғра келип қалса буниң нишани чәтәлликләр болиду,” дегән.

Һалбуки, хитай һөкүмитиниң санлиқ мәлуматлиридин қариғанда, “хитайда таҗсиман вируси контрол қилинди” дегән тәшвиқат оттуриға чиққандин буян хитай чеграсидин киргән һәмдә йеңидин вирус юқумдари, дәп бекитилгән “чәтәлликләр” ниң 90 пирсәнтидин көпрәки чәтәл пуқралиқидики хитайлар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт