Xitayning yünnen ölkiside 3 meschitni péchetlishi yerlik tungganlarning naraziliqini qozghidi

Muxbirimiz erkin
2018-12-31
Élxet
Pikir
Share
Print

Xitay da'irilirining yünnen ölkisidiki wéyshen nahiyeside 3 meschitni "Qanunsiz sélin'ghan" dégen seweb bilen péchetlep, chéqishqa urunushi, yerlik tungganlarning qattiq naraziliqigha uchrighan. Ötken shenbe küni meschitni péchetleshke kelgen saqchilar bilen yerlik tungganlar otturisida toqunush kélip chiqip, bir qisim kishiler tutqun qilin'ghan. Xongkongdiki "Jenubiy xitay etigenlik pochtisi" gézitining xewiride, da'irilerning ötken shenbe küni wéyshen nahiyesidiki atalmish "Qanunsiz sélin'ghan" 3 meschitni péchetligenlikini bildürgen. Xewerde bayan qilinishiche, wéyshen nahiyelik teshwiqat bölümi weqede adem tutqun qilin'ghanliqini delilleshni ret qilip, lékin saqchilarning qanunsiz ibadetke qarshi zörür tedbirlerni alghanliqini bildürgen. Yéqinda wéyshen nahiyelik milliy we diniy ishlar komitéti mezkur nahiyening xuyxuydéng, senja we mamichang yéziliridiki 3 meschitning "Qanunsiz sélin'ghanliqi", bu meschitlerde "Qanunsiz diniy terbiye" élip bérilghanliqini ilgiri sürüp, bu meschitlerni péchetlesh we chéqishni qarar qilghan. Lékin, bu qarar yerlik étiqadchi tunggan ammisining naraziliqini qozghighan.

Ötken shenbe küni meschitni péchetleshke kelgen saqchilar bilen meschit ehli otturisida toqunush kélip chiqqan idi. Mezkur weqe xitay da'irlirining tungganlar merkezlik olturaqlashqan ningshya we gensuda ereb tili mekteplirini taqash, ereb yéziqini cheklesh, bezi meschitlerni chéqishqa qarshi yüz bergen naraziliq weqeliridin kéyin yüz bergen yene bir toqunushtur. 

Bu yil yazda da'iriler ningshyadiki wéyju merkizi meschitini "Qanunzhi sélin'ghan" dégen seweb bilen chéqishqa buyrighan. Biraq bu yerlik tungganlarning qattiq qarshiliqigha uchrap, da'iriler chéqishni kéchiktürüshke mejbur bolghan idi. Közetküchilerning ilgiri sürüshiche, nöwette xitay hökümiti Uyghur aptonom rayonida yol qoyup kéliwatqan islam dinini chekleshke da'ir bezi tedbirlerni ichkiri ölkilerdiki tunggan rayonlirigha kéngeytmekte iken. Xitay hökümiti ilgiri Uyghur aptonom rayoni roza tutush, zakat bérish, hej qilish, saqal qoyush, hijablinish, balilargha diniy isimlarni qoyush, tesbih tartish, a'ililerde diniy kitab we diniy buyumlarni saqlash dégendeklerni we her xil diniy ibadet shekillirini chekligen. Xilapliq qilghuchilar "Diniy esebiylik" bilen eyiblinip, qamaq jazalirigha höküm qilin'ghan yaki lagérlargha élip kétilgen idi.

Toluq bet