Америка кеңәш палата әзаси чак граслей: "хитай диний бастурушқа хатимә бериши керәк"

Мухбиримиз әркин
2018-10-26
Share

Америка кеңәш палата әзаси, кеңәш палатаси қанун комитетиниң рәиси чак граслй хитайниң диний бастурушқа қәтий хатимә бериши керәкликини тәкитлигән.

Чак граслей бу айниң башлири кеңәш палатасиға қарар лайиһәси сунуп, хитайниң уйғур, тибәт, христиан вә башқа диний гуруһларни бастурушини қаттиқ тәнқид қилған кеңәш палата әзалириниң бири.

У 25‏-өктәбир "политика" журнилида елан қилинған мақалисидә қарар лайиһәсидә хитайниң өз асаси қануниға әмәл қилиши тәләп қилинип, "президент трамп вә униң һөкүмитиниң 1988‏-йили мақулланған хәлқара диний әркинлик қануни, франк волф хәлқара диний әркинлик қануни вә йәр шари магнитиский қанунини ишқа селиш арқилиқ диний әркинликни қоғдаш тәдбири елишқа чақирилғанлиқи" ни билдүргән.

У хитайниң диний әркинликкә еғир хилаплиқ қиливатқанлиқини агаһландуруп мундақ дегән: "хитайда христиан поплириниң қамаққа елинғанлиқи, ‹инҗил' ниң көйдүрүлгәнлики, черкавларниң чеқилғанлиқиға даир кишини биарам қилидиған хәвәрләр келишкә башлиди. Хитай һөкүмити йәнә бир милйондин артуқ уйғур вә қазақ мусулманлирини тутқун қилип, лагерларға солиди, тибәт буддистлири вә шундақла фалунгоң муритлирини узундин бери бастуруп кәлди".

У йәнә бу йилниң башлири "форбес" журнилида елан қилинған бир мақалида хитай даирилириниң уйғур мусулманлириниң өйлирини қандақ чеқиватқанлиқи, уларниң паспортлирини тартивелип, саяһәт қилиши чәкләнгәнлики, д н а вә бармақ әвришкисини йиғип, өз пуқралирини тәқиб астиға алғанлиқини билдүргән.

Униң илгири сүрүшичә, кишиләрниң қәйәрдә яшишидин қәтийнәзәр һәр бир шәхс өзиниң диний етиқадини әркин ипадилийәлиши керәк икән. У "америка қурулғандин бери әркинликниң байрақдарлиқ ролини ойнап кәлди. Биз бу әнәнимизни америкида вә дуняда кишилик һоқуқ һәмдә әркинликни алға сүрүш арқилиқ давамлаштурушимиз керәк," дегән.

Чак граслейниң мақалиси трамп һөкүмити америка дөләт мәҗлисиниң "магнитискйи йәр шари қануни" ни ишқа селип, уйғурларни хорлашқа иштирак қилған хитай әмәлдарлирини җазалашни тәләп қиливатқан бир мәзгилдә елан қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт