Amérika kéngesh palata ezasi chak grasléy: "Xitay diniy basturushqa xatime bérishi kérek"

Muxbirimiz erkin
2018-10-26
Share

Amérika kéngesh palata ezasi, kéngesh palatasi qanun komitétining re'isi chak grasly xitayning diniy basturushqa qet'iy xatime bérishi kéreklikini tekitligen.

Chak grasléy bu ayning bashliri kéngesh palatasigha qarar layihesi sunup, xitayning Uyghur, tibet, xristi'an we bashqa diniy guruhlarni basturushini qattiq tenqid qilghan kéngesh palata ezalirining biri.

U 25‏-öktebir "Politika" zhurnilida élan qilin'ghan maqaliside qarar layiheside xitayning öz asasi qanunigha emel qilishi telep qilinip, "Prézidént tramp we uning hökümitining 1988‏-yili maqullan'ghan xelq'ara diniy erkinlik qanuni, frank wolf xelq'ara diniy erkinlik qanuni we yer shari magnitiskiy qanunini ishqa sélish arqiliq diniy erkinlikni qoghdash tedbiri élishqa chaqirilghanliqi" ni bildürgen.

U xitayning diniy erkinlikke éghir xilapliq qiliwatqanliqini agahlandurup mundaq dégen: "Xitayda xristi'an poplirining qamaqqa élin'ghanliqi, 'injil' ning köydürülgenliki, chérkawlarning chéqilghanliqigha da'ir kishini bi'aram qilidighan xewerler kélishke bashlidi. Xitay hökümiti yene bir milyondin artuq Uyghur we qazaq musulmanlirini tutqun qilip, lagérlargha solidi, tibet buddistliri we shundaqla falun'gong muritlirini uzundin béri basturup keldi".

U yene bu yilning bashliri "Forbés" zhurnilida élan qilin'ghan bir maqalida xitay da'irilirining Uyghur musulmanlirining öylirini qandaq chéqiwatqanliqi, ularning pasportlirini tartiwélip, sayahet qilishi cheklen'genliki, d n a we barmaq ewrishkisini yighip, öz puqralirini teqib astigha alghanliqini bildürgen.

Uning ilgiri sürüshiche, kishilerning qeyerde yashishidin qet'iynezer her bir shexs özining diniy étiqadini erkin ipadiliyelishi kérek iken. U "Amérika qurulghandin béri erkinlikning bayraqdarliq rolini oynap keldi. Biz bu en'enimizni amérikida we dunyada kishilik hoquq hemde erkinlikni algha sürüsh arqiliq dawamlashturushimiz kérek," dégen.

Chak grasléyning maqalisi tramp hökümiti amérika dölet mejlisining "Magnitiskyi yer shari qanuni" ni ishqa sélip, Uyghurlarni xorlashqa ishtirak qilghan xitay emeldarlirini jazalashni telep qiliwatqan bir mezgilde élan qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet