Rozhdéstwo bayrimidin kéyinla xitayda birqisim chérkawlardiki krést belgilirini mejburi éliwétildi

Muxbirimiz méhriban
2015-12-29
Share

Xristi'anlarning rozhdéstwo bayrimining 4-küni yeni 28-dékabir küni kechqurun jéjiyang ölkisi wénju shehiride da'iriler ewetken saqchilar chérkaw munariliridiki krést belgilirini mejburi éliwétish weqesi yüz berdi.

29-Dékabir radi'omiz guwangdong bölümige ehwal inkas qilghan bir xristi'an muritining bildürüshiche, düshenbe küni kech sa'et 7 lerde 70 tin artuq puqrache kiyin'gen saqchi kran mashinisi bilen chérkawgha kelgen we chérkaw munaridiki kréist belgisini éliwetmekchi bolghan. Hökümet da'iriliri chérkawgha aldin-ala uqturush qilmighini üchün, chérkawdiki muritlar puqrache kiyin'gen saqchilardin saqchi kinishkisi yaki kimlikini körsitishni telep qilghan. Emma kiristni éliwétish üchün kelgenler kinishkisini körsitishke unimighandin kéyin, xristi'an muritliri bilen ular otturisida toqunush yüz bergen.Weqeni bir terep qilishqa kelgen saqchilar ehwalni yuqirigha melum qilidighanliqini bildürgen. Kech sa'et 10 larda chérkaw munaridiki krést belgisi mejburi éliwétilgen.

Rozhdéstwo mezgilide yene sichüen ölkisining nenchung shehiridiki bir chérkaw dölet zéminini qoghdash saqchilirining rozhdéstwo bayrimi mezgilide chong kölemlik yighilish qilmasliq uxturushini tapshuruwalghan. Netijide eslide 500 din artuq muriti bolghan bu chérkaw, saqchilarning tutqun qilishidin saqlinish üchün, rozhdéstwo küni peqet 20-30 adem qatnashqan kichik kölemdiki diniy yighilish qilishqa mejbur bolghan.

Xitaydiki diniy cheklimiler xelq'ara diniy jem'iyetler, kishilik hoquq teshkilatliri we gherb döletlirining tenqidlishige uchrap kéliwatqan bolup, yéqinqi yillarda Uyghur rayonida yolgha qoyuluwatqan meschitler munaridiki islam dinining ay belgisini éliwétish, birnechche yil ilgiri yerlik hökümet da'irilirining buyruqi bilen, meschit munari, meschit hoylisi hetta meschit méhrabigha xitay dölet bayriqini qadash herikiti bashlinip, kuchar qatarliq jaylarda bu buyruq mejburi ijra qilin'ghanliqi heqqide radi'omiz xewer bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet