Улрих делюс: "хитай дунядики интернет әркинликиниң әң чоң дүшмини!"

Мухбиримиз әзиз
2018-01-02
Share

Йеқинда баш оргини германийәдики "тәһдит астидики милләтләр тәшкилати" баянат елан қилип, хитай һөкүмитиниң нөвәттә дунядики интернет әркинликиниң әң чоң дүшмини болуватқанлиқини көрсәтти.

Мәзкур тәшкилатниң рәиси улрих делюс бу мунасивәт билән қилған сөзидә хитай бихәтәрлик тармақлириниң системилиқ һалда интернет саһәсидики учур әркинликини боғуп кәлгәнликини, шуниңдәк мушу сәвәбтин нурғунлиған кишиләрниң биһудә җазаға учраватқанлиқини билдүргән.

У баянатида уйғурлар дияридики интернет әркинликиниң хитай бойичә әң қаттиқ чәклимиләргә дуч келиватқанлиқини алаһидә тәкитлигән.

Баянатта ейтилишичә, өткән бирнәччә йил ичидә хитай даирилири уйғур тор башқурғучилардин он нәччә кишини қолға алған вә қамаққа һөкүм қилған. Җүмлидин уйғур зиялий илһам тохтиму тор бети ечип, уйғурларниң кишилик һоқуқлириниң дәпсәндә болуватқанлиқини паш қилғанлиқи үчүн өмүрлүк қамақ җазасиға дуч кәлгән.

У бу һәқтә сөз қилип: "хитай һөкүмити хәлқтин зинһар пинһан тутушни халайдиған учурларни интернет арқилиқ хәлққә тарқатқанлиқ - бу уйғур тор башқурғучилириниң бирдин-бир җинайитидур" дәп көрсәткән.

Хитай һөкүмитиниң алақидар учурлирида көрситилишичә, 2015-йилидин буян хитайда он милйон тор ишләткүчи тосуветилгән, 13 миңдин артуқ тор бети тақиветилгән. Гәрчә хитай һөкүмити пәқәт шәһванийлиқ вә зорлуқни тәшвиқ қилғучи тор бекәтлирини чәкләйдиғанлиқини тәкитләп келиватқан болсиму, әмәлийәттә хитайда демократийә, инсан һәқлири яки қанун арқилиқ идарә қилиш мәзмунидики миңлиған тор бәтләр мәҗбурий тақиветилгән.

Улрих делюс бу һәқтә сөз қилип "хитай дөләт ахбаратиниң ‹хитайдики тор ишләткүчи 735 милйон кишиниң мутләқ көп қисми һөкүмәтниң бу хилдики тор контроллуқ сияситини қоллайду' дегән ялған-явидақ сөзи хитай пуқралириға қилинған әң зор һақарәттур" дәп көрситиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт