Ulrix délyus: "Xitay dunyadiki intérnét erkinlikining eng chong düshmini!"

Muxbirimiz eziz
2018-01-02
Share

Yéqinda bash orgini gérmaniyediki "Tehdit astidiki milletler teshkilati" bayanat élan qilip, xitay hökümitining nöwette dunyadiki intérnét erkinlikining eng chong düshmini boluwatqanliqini körsetti.

Mezkur teshkilatning re'isi ulrix délyus bu munasiwet bilen qilghan sözide xitay bixeterlik tarmaqlirining sistémiliq halda intérnét sahesidiki uchur erkinlikini boghup kelgenlikini, shuningdek mushu sewebtin nurghunlighan kishilerning bihude jazagha uchrawatqanliqini bildürgen.

U bayanatida Uyghurlar diyaridiki intérnét erkinlikining xitay boyiche eng qattiq cheklimilerge duch kéliwatqanliqini alahide tekitligen.

Bayanatta éytilishiche, ötken birnechche yil ichide xitay da'iriliri Uyghur tor bashqurghuchilardin on nechche kishini qolgha alghan we qamaqqa höküm qilghan. Jümlidin Uyghur ziyaliy ilham toxtimu tor béti échip, Uyghurlarning kishilik hoquqlirining depsende boluwatqanliqini pash qilghanliqi üchün ömürlük qamaq jazasigha duch kelgen.

U bu heqte söz qilip: "Xitay hökümiti xelqtin zinhar pinhan tutushni xalaydighan uchurlarni intérnét arqiliq xelqqe tarqatqanliq - bu Uyghur tor bashqurghuchilirining birdin-bir jinayitidur" dep körsetken.

Xitay hökümitining alaqidar uchurlirida körsitilishiche, 2015-yilidin buyan xitayda on milyon tor ishletküchi tosuwétilgen, 13 mingdin artuq tor béti taqiwétilgen. Gerche xitay hökümiti peqet shehwaniyliq we zorluqni teshwiq qilghuchi tor béketlirini chekleydighanliqini tekitlep kéliwatqan bolsimu, emeliyette xitayda démokratiye, insan heqliri yaki qanun arqiliq idare qilish mezmunidiki minglighan tor betler mejburiy taqiwétilgen.

Ulrix délyus bu heqte söz qilip "Xitay dölet axbaratining 'xitaydiki tor ishletküchi 735 milyon kishining mutleq köp qismi hökümetning bu xildiki tor kontrolluq siyasitini qollaydu' dégen yalghan-yawidaq sözi xitay puqralirigha qilin'ghan eng zor haqarettur" dep körsitidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet