Явропа парламенти хитай қолға алған кишилик һоқуқ паалийәтчилирини қоюветишни тәләп қилди

Мухбиримиз әзиз
2018-01-23
Елхәт
Пикир
Share
Принт

Вакаләтсиз милләтләр тәшкилатиниң тор бетидики учурларға қариғанда 18-январ күни явропа парламенти мәхсус қарар елип, хитай һөкүмитини қолға алған кишилик һоқуқ паалийәтчилирини дәрһал вә шәртсиз қоюп беришкә чақирған.

Қарарнамидә бу шәхсләрниң сөз әркинлики, диний етиқад әркинлики һәмдә башқа әқәллий кишилик һоқуқлири мәсилисини тәшәббус қилғанлиқи үчүн уларниң хитай түрмисигә мәһкум болғанлиқи алаһидә тәкитләнгән. Шуниң билән биргә бу инсанларниң қолға елиниши ялғуз хәлқара қанунларғила хилап болуп қалмастин, хитайниң өз қанунлириғиму хилап икәнлики көрситилгән.

Қарарнамидә көрситилишичә, хитай һөкүмити «террорлуққа қарши туруш» һәққидики қанун вә низамларни мақуллиғандин кейин, өктичи пикирдикиләр бу қанунлардики алақидар маддиларға бағлинип көпләп җазаланған. Болупму уйғур вә тибәт қатарлиқ хитай болмиған милләтләрниң һәқ вә һоқуқлири бу қанунлар сәвәбидин техиму еғир бузғунчилиққа учриған. Буниң билән кишилик һоқуқ саһәсидики дәпсәндичилик бирақла еғирлап кәткән.

Мәлум болушичә, явропа парламенти мәзкур қарарнамини чиқириштин илгири бир мәйдан муназирә вә муһакимә болуп өткән. Музакиридә явропа парламентини мушу мәсилиләр һәққидә хитай һөкүмитигә бесим ишлитишкә дәвәт қилиш, шуниң билән биргә хитай һөкүмитиниң қанунсиз қилмишлирини қаттиқ әйибләш муһим нуқтилардин болған.

Музакирә иштиракчилири, җүмлидин явропа парламентини муавин рәиси фабйо касталдо сөз қилип, «хитай һөкүмити инсанларниң ғурурини пайхан қилишни тохтитиши лазим» дәп көрсәткән. явропа парламентиниң әзалиридин илхан күчүк музакирә җәрянида уйғур зиялийси илһам тохтиниң әһвалини мәхсус тонуштурған.

Вакаләтсиз милләтләр тәшкилати бу қарарнамини қизғин қарши алидиғанлиқини билдүргән. Шундақла явропа парламенти билән биргә нөвәттә хитай түрмилиридә йетиватқан кишилик һоқуқ паалийәтчилириниң шәртсиз қоюп берилишини тәләп қилидиғанлиқини билдүргән.

Пикирләр (0)
Share
Толуқ бәт