Америкиниң бу йиллиқ кишилик һоқуқ доклати хитайниң йәрлик торлирида елан қилинди

Мухбиримиз шөһрәт һошур
2018-05-30
Елхәт
Пикир
Share
Принт

Бейҗиңдики америка әлчиханиси америкиниң бу йиллиқ кишилик һоқуқ доклатини хитайдики әң чоң аммиви торларниң бири болған шинлаң торида елан қилди.

Йиллардин бери хитай оқурмәнлири бу хил доклатларни торда тамдин атлаш тәдбири билән көрүп келиватқан болуп, бу қетим тамдин атлашни билмәйдиған оқурманләрниңму мәзкур доклатни көрүшигә имканийәт туғулған. Бу йил 4‏-айда елан қилинған мәзкур доклатта хитайдики кишилик һоқуқ мәсилилиригә кәң орун берилгәчкә, хитай даирилири әйни чағда бу доклатқа қарита наразилиқини билдүргән вә америка тәрәпни хитайниң ички ишлириға арилишиш, тәрәққиятиға тосқунлуқ қилиш билән әйиблигән иди.

Америка әлчиханисиниң шинлаң торидики билогида 29‏-май күни хитайчә елан қилинған бу доклат бир күн ичидә бир миң нәччә йүз қетим улап бесилған вә 800 нәччә киши инкас язған. Инкасчилардин бири «америка һөкүмити хитайдики ишларни хитай пуқралиридинму яхши билидикән» дәп язған.

Бүгүн радийомиз хитайчә бөлүминиң ениқлишичә, мәзкур доклатниң хитайдики йәрлик тор бәтләрдә елан қилиниши хитай даирилирини инкас қайтурушта әпсиз әһвалға чүшүрүп қойған. Радийомизға бу һәқтә пикир қилған гуаңдоңдики бир кишилик һоқуқ паалийәтчиси нөвәттә хитай тәрәп бу доклатни өчүргүзивәтсә буниң бир аҗизлиқниң ипадиси болуп қалидиғанлиқи, әмма өчүрмисә мәзкур доклатни техиму көп кишиниң көрүп хитай даирилириниң әпти-бәшириси ашкара болидиғанлиқини илгири сүргән.

Пикирләр (0)
Share
Толуқ бәт