Amérika we xelq'ara kishilik hoquq teshkilatliri xitayni "Tyen'enmén weqesi" ning heqiqi ehwlini ashkarlashqa chaqirdi

Muxbirimiz erkin
2018-06-04
Share

Amérika dölet ishliri ministiri mayk pampé'o 4‏-iyun bayanat élan qilip, xitay hökümitini 1989‏-yili tyen'enmén meydanida öltürülgen, tutqun qilin'ghan yaki iz déreksiz ghayip bolghan oqughuchilarning sanini toluq ashkarlashqa chaqirdi.

Xitay hökümiti 1989‏-yili 4‏-iyun küni tanka, broniwiklarni ishqa sélip tyenenmin meydanini igillep yatqan oqughuchilarni basturghan. Xitay da'iriliri hazirgha qeder shu qétimqi basturushta zadi qanchilik oqughuchining öltürülgenlikini héchqachan élan qilip baqmighan. Kishilik hoquq teshkilatliri shu qétimliq basturushta bir qanche yüzdin bir qanche mingghiche ademning öltürülgenlikini perez qilip kelmekte. Mayk pampé'o mezkur weqening 29 yilliq xatire küni munasiwéti bilen élan qilghan bayanatida "4‏-Iyunning rohiy téxi aram tapmighanliqi" eskertip, "Biz xelq'ara jem'iyet bilen birlikte xitay hökümiti teripidin öltürülgen, tutqun qilin'ghan yaki ghayip qiliwétilgenlerning toluq sanining ashkarilinishini chaqirimiz," dep tekitligen.

Düshenbe küni yene amérika dölet mejlisining xitay ishliri komitéti, xelq'ara kishilik hoquqni közitish teshkilati, dunya Uyghur qurultiyi qatarliq organ we teshkilatlar bayanat élan qilip, mezkur weqeni xatirlidi. Amérika dölet mejlisi xitay ishliri komitétining bayanatida "Tyen'enmén qirghinchiliqining xatirisi bizge insanning négizlik izzet-hörmiti we tüp kishilik hoquqiqa bolghan arzu-isteklirining rayon we dölet bilen cheklenmeydighanliqini xatirlitidu," déyilgen. Dunya Uyghur qurultiyining bayanatida namayishchilarni, bolupmu démokratiye, kishilik hoquq üchün hayatidin ayrilghanlarni xatirleydighanliqini bildürüp, "Uyghurlar, tibetler, jenubiy monggholyelikler we nurghun xitaylarning hazirgha qeder bu nishan üchün küresh qilip kéliwatqanliqi" ni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet