Явропа иттипақи хитай билән болған диалогида кишилик һоқуқта чиң турушқа чақирилди

Мухбиримиз әркин
2018-06-14
Елхәт
Пикир
Share
Принт

Кишилик һоқуқни көзитиш тәшкилати, хәлқара кәчүрүм тәшкилати, дуня уйғур қурултийи, чеграсиз мухбирлар тәшкилати қатарлиқ 22 тәшкилат 14‏-июн күни бирләшмә баянат елан қилип, явропа иттипақиниң йеқинда өткүзүлидиған «явропа иттипақи-хитай башлиқлар йиғини» да кишилик һоқуқ мәсилисигә пүтүн күчини чиқиришини тәләп қилди.

Баянатта явропа иттипақи рәһбәрлириниң хитайни нобел тинчлиқ мукапатиниң саһиби лю шавбониң аяли лю ша, шиветсийә пуқраси гу миңхәй, түрмидики уйғур зиялийси илһам тохти, хитай өктичи ваң чүәнҗаң, тибәт паалийәтчиси ташқи ваңчук қатарлиқ хитай түрмисидики сиясий мәһбуслар вә тутқунларни қоюп беришкә ашкара вә хупиянә дәвәт қилиши тәләп қилинған.

«явропа иттипақи-хитай башлиқлар йиғини» 7‏-айниң оттурилири бейҗиңда өткүзүлидикән. Йиғинға явропа комиссийәсиниң рәиси җен-клавде җункер, явропа кеңәшиниң президенти доналд туск, явропа иттипақиниң ташқи ишлар комиссари федирика мугарини қатарлиқлар қатнишидикән.

Баянатта кишилик һоқуқни көзитиш тәшкилатиниң явропа ишлириға мәсул хадими лоте лейчниң сөзи нәқил кәлтүрүлүп, явропа иттипақи рәһбәрлириниң кишилик һоқуқ паалийәтличилирини қоллашқа вәдә қилғанлиқи, «мана һазир уларниң өз вәдисини ада қилип, лю ша, гу миңхәй вә башқа нурғун кишиләрни дәрһал қоюп беришни ишқа ашурушни истратегийәлик муһим орунға қоюш вақти кәлгәнлики» тәкитләнгән.

Баянатта йәнә явропа иттипақиниң һазирғичә хитай түрмисидики һечқандақ бир сиясий мәһбусниң қоюп берилишигә қадир болалмиғанлиқи, униң 2012‏-йили елан қилған кишилик һоқуқ истратегийә рамкисидики «әркинлик, демократийә, кишилик һоқуқни толуқ қоллаш» вәдисини иҗра қилмиғанлиқи алаһидә әскәртип өтүлгән.

Баянатта: «хитай һөкүмити өзиниң сиясәтлиридә етник милләтләр вә диний җамаәтләрниң түп һоқуқлирини системилиқ түрдә рәт қилип кәлди вә қанунлирида ислаһат елип бериш үмидини йоққа чиқарди,» дейилгән.

Пикирләр (0)
Share
Толуқ бәт