Yawropa ittipaqi xitay bilen bolghan di'alogida kishilik hoquqta ching turushqa chaqirildi

Muxbirimiz erkin
2018-06-14
Élxet
Pikir
Share
Print

Kishilik hoquqni közitish teshkilati, xelq'ara kechürüm teshkilati, dunya Uyghur qurultiyi, chégrasiz muxbirlar teshkilati qatarliq 22 teshkilat 14‏-iyun küni birleshme bayanat élan qilip, yawropa ittipaqining yéqinda ötküzülidighan "Yawropa ittipaqi-xitay bashliqlar yighini" da kishilik hoquq mesilisige pütün küchini chiqirishini telep qildi.

Bayanatta yawropa ittipaqi rehberlirining xitayni nobél tinchliq mukapatining sahibi lyu shawboning ayali lyu sha, shiwétsiye puqrasi gu mingxey, türmidiki Uyghur ziyaliysi ilham toxti, xitay öktichi wang chüenjang, tibet pa'aliyetchisi tashqi wangchuk qatarliq xitay türmisidiki siyasiy mehbuslar we tutqunlarni qoyup bérishke ashkara we xupiyane dewet qilishi telep qilin'ghan.

"Yawropa ittipaqi-xitay bashliqlar yighini" 7‏-ayning otturiliri béyjingda ötküzülidiken. Yighin'gha yawropa komissiyesining re'isi jén-klawdé junkér, yawropa kéngeshining prézidénti donald tusk, yawropa ittipaqining tashqi ishlar komissari fédirika mugarini qatarliqlar qatnishidiken.

Bayanatta kishilik hoquqni közitish teshkilatining yawropa ishlirigha mes'ul xadimi loté léychning sözi neqil keltürülüp, yawropa ittipaqi rehberlirining kishilik hoquq pa'aliyetlichilirini qollashqa wede qilghanliqi, "Mana hazir ularning öz wedisini ada qilip, lyu sha, gu mingxey we bashqa nurghun kishilerni derhal qoyup bérishni ishqa ashurushni istratégiyelik muhim orun'gha qoyush waqti kelgenliki" tekitlen'gen.

Bayanatta yene yawropa ittipaqining hazirghiche xitay türmisidiki héchqandaq bir siyasiy mehbusning qoyup bérilishige qadir bolalmighanliqi, uning 2012‏-yili élan qilghan kishilik hoquq istratégiye ramkisidiki "Erkinlik, démokratiye, kishilik hoquqni toluq qollash" wedisini ijra qilmighanliqi alahide eskertip ötülgen.

Bayanatta: "Xitay hökümiti özining siyasetliride étnik milletler we diniy jama'etlerning tüp hoquqlirini sistémiliq türde ret qilip keldi we qanunlirida islahat élip bérish ümidini yoqqa chiqardi," déyilgen.

Toluq bet