Америка һөкүмити хитайни кишилик һоқуқ паалийәтчилирини қоюп беришкә чақирди

Америка дөләт ишлар кабинети ахбарат ишханиси башлиқи елизабит тореоду дүшәнбә күни баянат берип, хитайни “дөләт һакимийитини ағдуруш” җинайити артилип қамаққа һөкүм қилған кишилик һоқуқ адвокати җу шифең, кишилик һоқуқ паалийәтчиси ху шиген, сүй йәнмиң, го гуңго қатарлиқларни қоюп беришкә чақирди.

Америка авази радийосиниң сәйшәнбә күнидики хәвиридә елизабит торидониң “биз хитай һөкүмитини һазирға қәдәр тутуп турулуватқан адвокатлар вә кишилик һоқуқ паалийәтчилирини қоюп беришкә чақиримиз. Уларниң ичидә әлвәттә һөкүм елан қилинип болғанларму бар” дегән сөзлири нәқил елинған.

Бу төтәйләнгә өткән һәптә хитайниң тйәнҗин шәһәрлик 2-оттура сотида йәттә йерим йиллиқтин 3 йилға қәдәр муддәтлик қамақ җазаси берилгән. Улар хитай һөкүмити бултур яз пәслидә елип барған 9-июл адвокатларни тутқун қилиш вәқәсидә қолға елинғанлар болуп, әйни чағда 300 гә йеқин кишилик һоқуқ адвокати вә кишилик һоқуқ паалийәтчилири тутқун қилиниш, сорақ қилиниш қисмитигә йолуққан. Буларниң көп қисми қоюп берилгән болсиму, 20 дин артуқ адвокат вә кишилик һоқуқ паалийәтчисиниң “дөләтни ағдуруш”, “қутратқулуқ қилиш” қатарлиқ сиясий җинайәтләр билән рәсмий тутқун қилинғанлиқи хәвәр қилинған иди.