Хитайдики бир қисим орунларда корона вирусиниң йеңи вариянтини тәкшүрүш синиқи қайта башланған

Вашингтондин мухбиримиз ирадә тәйярлиди
2023.12.07

 Хитайниң һәрқайси чоң шәһәрлиридики дохтурхана вә қатнаш мәркәзлиридә корона вирусиниң йеңи вариянтини тәкшүрүшиниң қайта башланғанлиқи мәлум.

Радийомизниң бейҗиңдики бир қисим аһалиләрдин вә һөкүмәт чиқарған уқтурушлардин игилишичә, бейҗиңда нәпәс йоллири кесәлликлири билән дохтурға келиватқан балилар вә чоңларниң барғансери көпийиши нәтиҗисидә, даириләр корона вируси синиқини қайтидин башлиған.

Хитай даирилири йеқинқи хәвәрлиридә хитайда өпкә яллуғи вә башқа нәпәс йоли кесәлликлириниң көпәйгәнликини етирап қилип, униңға кокел мекоплазма өпкә яллуғи, нәпәс йоли бирикмә вируси, пәсил характерлик тарқилишчан зукам вә COVID-19 қатарлиқ кесәллик қозғатқучилар сәвәб болуватқанлиқини илгири сүргән иди.

Бирақ һазир хитай һөкүмити тәрипидин тарқитилған уқтурушларда, корона вируси билән юқумлинишниң йеңи долқуни һәққидә агаһландуруш бериливатқан болуп, хитайниң дөләт ишлири мәһкимиси йәнә йәрлик һөкүмәтләрни порт вә айродурумларда, мәктәп, санаторийә вә башқа орунларда вирус синиқини вә кесәлликләрни назарәт қилишни әслигә кәлтүрүшкә буйруған икән.

Бейҗиңдики исмини ашкарилашни халимиған бир аһалиниң радийомиз хитай бөлүмигә қилған сөзидә қаттиқ ағрип кәткәнликтин дохтурханида җиддий давалиниватқан қизиға корона синиқи қилинғанлиқини ейтип, “хәвәрләрдә корона вирусини тилға алмиған билән, әмәлийәттә бу вирусниң шәкил өзгәрткән йеңи нусхиси кәң тарқилип кәткәндәк қилиду.” дегән.

Йәнә бир бейҗиң аһалисиму чоңрақ вогзал вә хәлқара айродурумларда вә бәзи йиғин мәйданлирида һәқсиз корона синиқи қилиниватқанлиқини ейтқан.

Мәлум болушичә, хитайдики аһалиләр вирус синиқиниң пәйда болғанлиқини көрүп, буниң ақивитидә илгирикидәк “юқумни нөлгә чүшүрүш” сиясити билән кишиләрни айлап өйгә солитиветидиған тәдбирләрниң қайтип келишидин әндишиләнмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.