Xitay ichki muqimliq sélinmisini bu yil 5.5 Pirsent östürgen

Muxbirimiz erkin
2018-03-06
Share

Xitay maliye ministirliqi düshenbe küni xitay xelq qurultiyigha bergen doklatida, xitayning 2018‏-yilliq ichki muqimliq xam chotining 5.5 Pirsent östürülüp, az kem 200 milyard dollargha chiqirilghanliqini bildürgen.

Amérika "Wal strét zhurnili" gézitining xewiride körsitilishiche, ichki muqimliq xam chotidiki bu artish xitayda bolupmu tibet bilen Uyghur aptonom rayonida bixeterlik we éléktronluq közitishning qanchilik kücheygenlikini ipadileydiken.

Xitay hökümiti 2017‏-yili Uyghur aptonom rayonining ichki muqimliq sélinmisini aldinqi yilqidin 92.5 Pirsent ashurup, az kem 10 milyard dollargha yetküzgen.

Da'iriler mezkur rayonda torgha bolghan nazaretni kücheytip, keng kölemlik tekshürüsh ponkitlirini qurup chiqqan. Yuqiri sewiyelik közitish kamérasi we yüz tonush apparatlirini ornitip, aptomobillargha sün'iy hemrah arqiliq iz qoghlash eswablirini békitken. Bu arqiliq ularning kündilik herikitini qattiq kontrol astigha alghan idi.

Bezi analizchilar xitayning ichki muqimliq xam choti we uning Uyghur, tibet rayonliridiki ghayet zor bixeterlik sélinmisi bu rayonlarda térrorluqqa qarshi turushni bixeterlik emeldarlirining pul tépish yoligha aylandurup qoyghanliqi, bu kishilik hoquqning téximu éghir buzghunchiliqqa uchrishigha yol échiwatqanliqini tekitlep keldi.

Xitay maliye ministirliqining sanliq melumatida körsitilishiche, uning ichki muqimliq xam choti 2011‏-yildin béri izchil éship, uning dölet mudapi'e xam chotidin artip ketken.

"Wal strét zhurnili" gézitining tekitlishiche, xitayning Uyghur rayonida xelqning qan tipi örneklirini toplap, dunyadiki eng chong DNA uchur ambiri qurushi uning bu rayonning ichki muqimliq sélinmisining artip kétishige seweb bolghan amillarning biri iken.

"Wal strét zhurnili" géziti, "Xitay hökümitining yuqiriqi wasitilerni Uyghur we tibet rayonliridiki bölgünchilik heriketlirini yoqitishta zörür, dep qarisimu, biraq kishilik hoquq teshkilatlirining éghir milliy kemsitish bu rayonlardiki muqimsizliqning asasliq sewebi" dep qaraydighanliqini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.