Shangxeyge kelgen Uyghurlar we Uyghur rayonigha barghan chet el muxbirliri teqip-nazaretke élin'ghan

Amérika bixeterlik we nazaretchilik kespi tetqiqat guruppisi (IPVM) 5-ayning 2-küni axbarat élan qilip, shangxey saqchilirining bu sheherge kelgen Uyghurlar we Uyghur rayonigha barghan chet el muxbirlirini teqip-nazaret astigha alghanliqini ashkarilighan.

25 Milyon nopusi bar shangxey shehiridiki saqchi idarisi “Her sahediki yat, gheyriy ademlerni süzüp chiqidighan 26 xil modél (qélip, endize)” ni sanliq melumat ambirigha kirgüzüwetken bolup, uning birsi “Alahide xadimlarni körsitip bérish modéli” iken؛ Uyghur rayonigha baridighan ayropilan yaki poyizning bélitini zakaz qilghan chet el muxbirlirigha aptomatik belge urup qoyidiken.

Xitaydiki chet el muxbirliri kulubining 2021-yilliq doklatigha asaslan'ghanda, 2021-yil Uyghur rayonigha barghan muxbirlarning 88 pirsenti puqrache kiyin'gen saqchilarning teqip-nazaret qilishigha uchrighan.

26 Xil modélning yene biri “Shangxeyge kelgen Uyghurlarni bayqash” bolup, bu sheherge kelgen Uyghurlarni aptomatik tépiwalidiken. Ichkiri xitaygha kelgen Uyghurlar negila barsa teqip-nazaret astigha élinidiken we da'im saqchilarning so'al-soraqlirigha duch kélidiken.

Bu axbaratta éytilishiche, xitaydiki eli baba shirkiti saqchilargha “Uyghurlarni tonup bérish tor boshluqi mulazimiti” bilen teminleydiken, buni ularning özimu étirap qilghan bolup, irqiy kemsitishke munasiwetlik sün'iy eqil détallirini tetqiq qilghanliqini, emma buning melum milletke qaritilidighanliqini oylap baqmighanliqini bildürgen.